विश्व पौडेलले सिफारिस समितिबाट दिए राजीनामा, गभर्नर नियुक्तिलगत्तै फस्न सक्छन् कानूनी उल्झनमा

काठमाण्डौ । गभर्नर सिफारिस समितिका सदस्य डा. विश्व पौडेलले पदबाट राजीनामा दिएका छन् ।  

उनलाई प्रमुख सत्तारुढ दल नेकपा एमालेका अध्यक्ष तथा प्रधानमन्त्री केपी शर्मा ओली र कांग्रेस सभापति शेरबहादुर देउवाबीच राष्टबैंकको गभर्नर बनाउने सहमति भएसँगै डा. पौडेलले सिफारिस समितिको सदस्य पदबाट राजीनामा दिएका हुन् । 

अर्थ मन्त्रालयस्थित उच्च स्रोतका अनुसार डा. पौडेलले आज(आइतबार) नै गभर्नर सिफारिस समितिका अध्यक्ष तथा अर्थमन्त्री विष्णुप्रसाद पौडेल समक्ष राजीनामा बुझाएका हुन् ।  

ओली र देउवाले शनिवारको छलफलपछि डा. पौडेललाई कांग्रेसको सिफारिसमा गभर्नर बनाउने सहमति गरेका थिए । सोही सहमति कार्यान्वयनका क्रममा पौडेलले सिफारिस समितिको सदस्य पद त्यागेका हुन् ।  

उनलाई चैत दोश्रो साता राष्ट्रबैंकको १८ औं गभर्नर सिफारिस समितिको सदस्य पदमा नियुक्त गरिएको थियो । तर, गभर्नर सिफारिस समितिको एउटा पनि बैठक नबसी उनी सदस्यबाट विदा भएका हुन् ।  

यसअघि प्रमुख दलका शीर्ष नेताबीच केन्द्रीय बैंकबाट कार्यकारी निर्देशक पदबाट राजीनामा गरेका डा. गुणाकर भट्टलाई गभर्नर बनाउने सहमति भएको थियो । तर, भट्टको राजीनामा कामू गभर्नर निलम ढुंगानाले स्वीकृत नपरेपछि कानूनी उल्झन आउने भयका कारण उनको नामबाट प्रमुख नेताहरु पछाडि हटेका थिए ।

डा. पौडेलले सिफारिस समितिबाट राजीनामा दिए पनि कांग्रेसको क्रियाशील सदस्य, महासमिति सदस्यमा भने यथावत छन् । राष्टबैंक ऐनले कुनै पनि दलको सदस्यता लिएको व्यक्ति गभर्नर बन्न नसक्ने परिकल्पना गरेको छ । यही व्यवस्थाका कारण पौडेल गभर्नरमा नियुक्त भएलगत्तै कानूनी उल्झनमा पर्ने देखिन्छ ।  

देउवा र ओलीबीच भोलि(सोमबार)को क्याबिनेटबाट गभर्नर सिफारिस समितिको रिक्त पद पूर्ति गरी आउँदो बिहीबार वा सम्भव भए भोलि नै नयाँ गभर्नर नियुक्त गर्ने सहमति भएको बुझिएको छ ।  

पढ्न छुट्यो कि ?

-सत्तारुढले नै गिजोले गभर्नर नियुक्ति प्रकरण, दम्भः दुईतिहाईको, नियुक्तिमा चाहिँ बलमिच्याईं

-गभर्नर बन्न सक्दैनन् डा. विश्व पौडेल, राष्ट्रबैंक ऐन बन्यो बाधक