.gif)
_(1).gif)
.png)
.png)
काठमाण्डौ । अर्थमन्त्री फ्याक्टरका कारण सोमबार ६ प्रतिशतले बढेपछि सर्किट लागेका कारण छोटो समय मात्र खुलेको बजारमा मंगलबार भने सोही फ्याक्टरले ३.३८ प्रतिशतको करेक्सन आएको छ ।
अर्थमन्त्रीको रुपमा बजारमैत्री नेता विष्णु पौडेलको आगमन हुने आशामा लगानीकर्ताहरुले थामिनसक्नु खरिदारी बढाउँदा सोमबारको बजारमा सर्किटमाथि सर्किट लागेको थियो । उच्च मनोबलसहित बजारमा खरीदको चाप बढाएका लगानीकर्ताहरु अर्थमन्त्रीमा पौडेल नआउने, बरु माओवादीका उपमहासचिव वर्षमान पुन आउनसक्ने सम्भावनाको खबरले २४ घण्टा बित्न नपाउँदै निराश देखिए । त्यसकै प्रभावले मंगलबार बजारमा ७०.३१ अंकको करेक्सन आयो ।
अघिल्लो दिन उछालको गतिमा बढेको बजारमा मंगलबार बिक्री गर्नेको लाइन लागेपछि नेप्से परिसूचक घटेर २००७.६९ विन्दूमा सीमित बन्न पुगेको छ भने कारोबार रकम ४ अर्ब ११ करोड माथि पुगेको छ।
(1).gif)
विश्लेषकहरुले सोमबार अर्थमन्त्री फ्याक्टरकै कारण बजारमा उछाल आएको र मंगलबार सोही फ्याक्टरले बजार घटाएको प्रष्ट पारेका छन् ।
बजारका लगानीकर्ताहरुमाझ वर्षमान पुन नै अर्थमन्त्री बन्ने खबर प्रवाह भए पनि पौडेलको सम्भावना अझै टरेको छैन । रास्वपाले गृहमन्त्रालयलाई आफ्नो बटमलाइन बनाएपछि एमालेले अर्थमन्त्रालयमा दाबी पेश गरिरहेको छ । उपप्रधानसहित अर्थमन्त्रीमा विष्णु पौडेललाई पठाउने एमालेको तयारी छ । अहिले सत्ता गठबन्धनको मन्त्रालय बाँडफाँड कार्यदलको बैठक बसिरहेको छ । यही बैठकले मन्त्रालय बाँडफाँडको विषय टुङ्गो लगाउने बताइएको छ ।
शीर्षस्थ नेताहरुले गठबन्धन सरकारमा सहभागी हुने दलहरुको विषय नटुङ्गिएसम्म मन्त्रालय बाँडफाँड नगर्ने प्रष्ट पारिसकेका छन् । यसको अर्थ यदि सरकारमा सहभागी दलहरुको विषयमा आज पनि टुङ्गो लागेन भने मन्त्रालय बाँडफाँडको काम भोलिका लागि थाँती रहनेछ ।
यसरी हेर्दा सेयर बजारका लगानीकर्ताहरुको अस्थिर मनोबलका कारण हिजो र आज बजारमा फरक परिदृश्य देखियो । अर्थमन्त्री को बन्ने भन्ने विषय नटुङ्गिदै सम्भावनाकै पछाडि लागेर लगानीकर्ताहरुले बजारमा खरीदारी र बिक्री बढाउने काम गरेका छन् । यसलाई कतिपयले भने ‘अपरिपक्वता’को संज्ञा समेत दिएका छन् ।
यो दिन बलिया र राम्रा कम्पनीको मापक सेन्सेटिभ इन्डेक्स पनि ३.२४ प्रतिशतले घटेर ३५७.३० विन्दुमा पुगेको छ । यो दिन नेप्सेमा सूचीकृत मध्ये ३१६ वटा कम्पनीको १ करोड १४ लाख ६७ हजार ५९९ कित्ता सेयर ४ अर्ब ११ करोड ३६ लाख रुपैयाँभन्दा बढीको कारोबार भएको छ ।
आजको बजारबारे बजार जानकार अजयसिंह थापा(जयशम्भु) भन्छन्, ‘हिजोको बजार बढ्नु पर्ने कुनै कारण थिएन । अर्थमन्त्रिमा विष्णु पौडेल नाम अघि सारेर बजारलाई उछालिएको मात्रै हो ।’ आज विष्णु पौडेल अर्थमन्त्रि नबन्ने देखिएपछि बजारमा भारी गिरावट आउन पुगको उनी बताउँछन् ।
विष्णु पौडेल आएपनि दीर्घकालका लागि बजार स्थिर हुन नसक्ने र बजारको आधारभूत समस्या समाधान हुन नसक्ने उनले बताए । ‘हिजो बजार बढेकाले आज लगानीकर्तालाई सेयर बेचेर बाहिरिन सजिलो भएको छ । ’
अर्का बजार जानकार दामोदर गजुरेल भन्छन्‘ आज बजार घट्नुमा दुईवटा मुख्य कारण छन् । पहिलो कारण विष्णु पौडेल अर्थमन्त्रि नबन्ने देखिनु र अर्को कारण लगानीकर्तामा आत्मबलको कमी देखिनु हो । सरकारमा एमाले रहिरहने हो भने बजार पक्कै पनि बढ्नेछ । ’
वर्षमान पुन अर्थमन्त्रि बने चाँहि बजार साइडवेजमा चल्ने उनले बताए ।
यो दिन नेप्सेमा सूचीकृत १३ वटा समूहमध्ये म्युचुअल फण्डबाहेक अन्य सबै समूहमा गिरावट आएको छ । आज म्युचुअल फण्ड सूमह ०.६६ प्रतिशतले बढेको छ । आज सबैभन्दा धेरै गिरावट अन्य समूहमा आएको छ । अन्य समूह आज ४.३५ प्रतिशतले घट्यो ।
यस्तै बैंकिङ समूह ३.०१ प्रतिशत,विकास बैंक ३.६५,वित्त २.७५,होटल ३.६९,हाईड्रो ४.३०,लगानी ३.४८,जीवन बीमा ३.४९ उत्पादन तथा प्रशोधन ४.२०,लघुवित्त १.२७,निर्जीवन बीमा २.६० र व्यापार समूह २.१५ प्रतिशतले घटेको छ ।
धेरै कारोबार गर्ने कम्पनी
आज सोनापुर मिनरल्सको सर्वाधिक सेयर कारोबार भएको छ । यो कम्पनीको आज ४१ करोड ९१ लाख बढीको सेयर कारोबार भएको छ । शिवम् सिमेन्टको २४ करोड ६५ लाख,घोराही सिमेन्टको १४ करोड ३१ लाख,जोशी हाईड्रोको १३ करोड १९ लाख र हिमालयन रि इन्स्योरेन्सको १२ करोड ८१ लाख बढीको सेयर कारोबार भएको छ ।
धेरै कमाउने र गुमाउने कम्पनीहरु
आज गुँरास लघुवित्तको सेयरमूल्य सर्वाधिक अर्थात ८.७३ प्रतिशतले बढेको छ । त्यस्तै महुली लघुवित्तको सेयरमूल्य ४.११ प्रतिशत र मोलुङ हाईड्रोको सेयरमूल्य ३.४१ प्रतिशतले बढेको छ । आज बजारमा दुईवटा कम्पनीको सेयरमूल्यमा नकारात्मक सर्किट लागेको छ । आज बोटलर्स नेपाल(बालाजु)को सेयरमूल्य १० प्रतिशत र जोशी हाईड्रोको सेयरमूल्य ९.९९ प्रतिशतले घट्दै नकारात्मक सर्किट लागेको छ । यो दिन बोटलर्स नेपाल(तराई)को सेयरमूल्य ९.४५ प्रतिशत,प्रभु इ्रन्स्योरेन्सको ८.६४,बिपिडब्लू लघुवित्तको ८.३१ र मनकामना स्मार्ट लघुवित्तको सेयरमूल्य ८.२३ प्रतिशतले घटेको छ । आज ३३ वटा कम्पनीको सेयरमूल्य बढेको छ भने २१३ वटा कम्पनीको सेयरमूल्य घटेको छ ।
.gif)
.png)
.jpg)
.jpg)
.jpg)
.png)
.png)
.gif)
.gif)
