महङ्गो कारको बुकिङ धमाधम रद्द गर्दै भारतीय धनाढ्यहरु, यस्तो छ कारण

AUTO
बिहीबार, श्रावण ८,२०८२ 14:09:48

काठमाण्डौ । भारतमा अधिकांश धनाढ्यहरुले महङ्गा कारहरुको बुकिङ धमाधम रद्द गर्न थालेका छन् । भारत र बेलायतबीच हुन लागेको व्यापार सम्झौताका कारण भारतीय धनाढ्यहरुले महङ्गा कारहरुको बुकिङ रद्द गर्न लागेका हुन् ।

भारत र बेलायबीच व्यापार सम्झौता हुन गईरहेको छ । जसको घोषणा गत मे महिनामा भएको थियो । यो सम्झौताअनुसार कारहरुमाथि लाग्दै आएको कर कम हुनेछ । अहिले बेलायतबाट आयत हुने कारहरुमाथि ७५ देखि १२५ प्रतिशतसम्म कर लाग्दै आईरहेको छ । सम्झौतापश्चात यो कर घटेर १० प्रतिशतमा सीमित हुनेछ ।

त्यसैले भारतीय धनाढ्य तथा ग्राहकहरुले कर घटेपछि मात्रै कार खरिद गर्ने योजना बनाउन थालेका छन् । उनीहरुले यसअघि महङ्गो मूल्यमा गरेको बुकिङ धमाधम रद्द गर्न थालेको भारतीय मिडियाले बताएका छन् ।

बेलायतमा ल्याण्ड रोभर, ज्यागुअर, रोल्स रोयस, बेन्टले,एस्टन मार्टिन, लोटस र म्याकल्यारेन जस्ता महङो मूल्य पर्ने कारहरु बन्ने गर्छन् । ज्यागुअर र ल्याण्ड रोभरलाई भारतको टाटा मोटर्सले खरिद गरेको छ ।

भारतीय डिलरहरुले कर कहिलेदेखि कम हुने वा बिस्तारै कम हुने भन्ने विषयमा आफूलाई जानकारी नभएको बताएका छन् । भारतमा स्तरिय मोडलका कार बेलायतको तुलनामा ३ गुणासम्म महङ्गो पर्ने गर्छ । चर्को कर र स्थानिय रजिष्ट्रेशन चार्ज जस्ता विषयले भारतमा बेलायती कार महङ्गो हुने गरेको छ ।