स्वाबलम्बन लघुवित्तले कमायो रु.४४.२६ करोड नाफा, लाभांश क्षमता १७.६०%

काठमाण्डौ । स्वाबलम्बन लघुवित्त वित्तीय संस्थाले गत आवको अन्त्यसम्म ४४ करोड २६ लाख रुपैयाँ नाफा कमाएको छ । संस्थाले कमाएको यो नाफा अघिल्लो आवको तुलनामा २३.०४ प्रतिशत बढी हो । अघिल्लो आवमा संस्थाले ३५ करोड ९७ लाख रुपैयाँ नाफा कमाएको थियो । संस्थाको खुद ब्याज आम्दानी बढ्दा नाफामा सुधार देखिएको हो । 

अघिल्लो आवमा १ अर्ब ५२ करोड १३ लाख रुपैयाँ खुद ब्याज आम्दानी गरेको यो संस्थाले गत आवमा १ अर्ब ८३ करोड ७३ लाख रुपैयाँ आम्दानी गरेको छ । यस हिसाबमा संस्थाको ब्याज आम्दानी २०.७७ प्रतिशत वृद्धि भएको छ । 

साथै कमिसन आम्दानी २१.२२ प्रतिशतले बढेर ३६ करोड ६० लाख रुपैयाँ पुगेको छ । अघिल्लो आवमा यस्तो आम्दानी ३० करोड १९ लाख रुपैयाँ थियो । आम्दानी र नाफा बढेपनि संस्थाको खराब कर्जा भने बढ्न पुगेको छ । अघिल्लो आवमा ७.९२ प्रतिशत मात्रै रहेको संस्थाको एनपीएल गत आवमा बढेर ९.४९ प्रतिशत पुगेको छ । 

साथै सिडि रेसियो सामान्य घटेर १२०.९८ प्रतिशत, बेस रेट १३.६८ प्रतिशत र स्प्रेड दर ७.२६ प्रतिशत पुगेको छ । संस्थाले गत आवको लागि भने २९ करोड १५ लाख रुपैयाँ वितरणयोग्य मुनाफा छुट्याएको छ भने लाभांश क्षमता १७.६० प्रतिशत रहेको छ । सो अवधिसम्म संस्थाको इपीएस २६.०४ रुपैयाँबाट बढेर २७.८९ रुपैयाँ पुगेको छ भने नेटवर्थ २२७.०५ रुपैयाँ, पीई रेसियो ३१.६० गुणा र तरलता अनुपात ५.०९ प्रतिशत रहेको छ ।