गार्डियन माइक्रो लाइफ इन्स्योरेन्सको नाफामा २६००% को सुधार, इपीएस कति ?

काठमाण्डौ । गार्डियन माइक्रो लाइफ इन्स्योरेन्सको खुद नाफा २६ सय प्रतिशतले वृद्धि भएको छ । अघिल्लो आवमा २२ लाख २९ हजार रुपैयाँ मात्रै नाफा कमाएको यो कम्पनीले गत आवमा ६ करोड १ लाख रुपैयाँ नाफा कमाउन सफल भएको छ । 

कम्पनीको कुल आम्दानीमा उल्लेख्य सुधार देखिदा नाफा ह्वात्तै बढ्न पुगेको हो । गत आवमा कम्पनीको कुल आम्दानी ४७ करोड ७ लाख रुपैयाँ पुगेको छ । जुन यो अघिल्लो आवको तुलनामा ४४३.२७ प्रतिशत बढी हो । अघिल्लो आवमा कम्पनीको आम्दानी जम्मा ८ करोड ६६ लाख रुपैयाँ मात्रै थियो । 

साथै कम्पनीको व्यवसायमा समेत उत्कृष्ट सुधार देखिएको छ । अघिल्लो आवमा ३ करोड ६९ लाख रुपैयाँ बीमाशुल्क आर्जन गरेको गार्डियनले गत आवमा ९८०.२३ प्रतिशतको ग्रोथ गरी ३९ करोड ९५ लाख रुपैयाँ बीमाशुल्क संकलन गरेको छ । व्यवसाय वृद्धिसँगै कम्पनीको दाबी भुक्तानी पनि उल्लेख्य बढेको छ । 

अघिल्लो आवमा जम्मा २६ लाख रुपैयाँ मात्रै भुक्तानी दिएको यो कम्पनीले गत आवमा ३७३१.८४ प्रतिशत बढाएर १० करोड २७ लाख रुपैयाँ बराबरको दाबी भुक्तानी दिएको छ । साथै कम्पनीको चुक्तापूँजी ४२.८६ प्रतिशतले बढेर ७५ करोड रुपैयाँ, बीमा कोषको आकार ८१८.२५ प्रतिशत बढेर २१ करोड ४९ लाख रुपैयाँ, रिटेन्ड अर्निङ ८३०४.३६ प्रतिशत बढेर ४ करोड ८१ लाख रुपैयाँ र महाविपत्ती कोषको आकार ३१३४.९० प्रतिशत बढेर ६२ लाख रुपैयाँ कोषमा संचित भएको छ ।

कम्पनीको इपीएस पनि ७.६० रुपैयाँ बढेर ८.०२ रुपैयाँ पुगेको छ भने प्रतिसेयर नेटवर्थ १०७ रुपैयाँ, पीई रेसियो २७३.४५ गुणा र प्रतिसेयर कुल सम्पत्तिको मूल्य १४३.४४ रुपैयाँ रहेको छ ।