राजनीतिक स्टन्ट गर्नेले आफूमाथि प्रतिशोध साँधेका विनोद चौधरीको आरोप

काठमाण्डौ । सांसद तथा नेपालका एक मात्र डलर अर्बपति विनोद चौधरीले आफूमाथि राजनीतिक स्टन्ट मन पराउनेहरुले प्रतिशोध साँध्न खोजेका दाबी गरेका छन् ।  

बाँसबारी जग्गा प्रकरणमा जिल्ला सरकारी वकिल कार्यालय काठमाण्डौ करिब २ घण्टा लामो बयान दिएर बाहिरिँदै गर्दा सञ्चारकर्मीहरुसँग कुरा गर्दै उनले यस्तो दाबी गरेका हुन् ।  

आफू संसदमै रहेको बेला तीन मिनेटभित्र आफूमाथि अनुसन्धान भइरहेको भनेर प्रहरीले लेखेको भनिएको गोप्यपत्र सुनियोजित रुपमै सार्वजनिक गरिएको उनको भनाई थियो ।

‘म संसदमै थिएँ । संसदमै हुँदाहुँदै तीन मिनेटभित्र त्यहाँ अनुसन्धानको बारेमा जानकारी गराएको गोप्यपत्र जुन रुपले देशका सबै सञ्चारमाध्यमहरुमा रंगिए, त्यसबाट यो स्टन्ट के उद्देश्यका लागि गरिएको हो भन्ने प्रष्ट भएको स्थिति छ ।’ उनले भनेका छन्–‘यो विषयमा कुरा उठ्नासाथ र मेरो भाइमाथिको अनुसन्धान सुरु हुनेबित्तिकै मैले दलको बैठकमा आफ्ना सबै कुराहरु राखेको थिएँ । जुन सार्वजनिक रुपमा बाहिर पनि आए । त्यसपछि ममाथिको अनुसन्धानको कुरा चल्नेबित्तिकै मैले रोस्टममा उठेर सदनमा यो विषय उठाएँ ।’  

आफूलाई बयानका लागि आउन भनेर मौखिक रुपमा जानकारी गराइएको र एक जिम्मेवार राजनीतिकर्मी, उद्योगी र नागरिक भएको हिसाबले अनुसन्धानमा सहयोग गर्न आएको समेत उनले प्रतिक्रिया दिए ।  

उनले ४२ वर्षअगाडिको प्रकरणलाई तोडमोड गरी त्यसबेलाको पब्लिक प्राइभेट पार्टनरसिपको उत्कृष्ट मोडलको रुपमा खडा गरिएको एउटा नवीनतम सोंचमाथि चरम राजनीतिकरण भएको तर्क समेत पेश गरे ।  

‘४२ वर्षअगाडिको बाँसबारीमा १० रोपनी जग्गाको मूल्य कति नै पथ्र्यो होला र ?’ भन्ने प्रश्न गर्दै उनले वर्षौदेखि हजारौं रोपनी जग्गामा निजी औद्योगिक ग्राम स्थापना गर्ने ग्रुपमाथि १० रोपनी जग्गाको विषयमा कुदृष्टि राखेको भनी आधारहीन आरोप लगाइएको र यो विकृत मानसिकताको उपजबाहेक केही नभएको टिप्पणी गरे ।  

उनले आफूले जीवनमा कहिल्यै पनि गलत ढंगको राजनीति नगरेको, तर अहिले एउटा उद्यमी, लगानीकर्ता र करदातामाथि राजनीतिकरण गर्न खोजिएको आरोप लगाए । ‘नेपाल उद्योग परिसंघको पूर्वअध्यक्षको हैसियतले, एउटा बिचारक र एउटा राजनीतिकर्मीको हैसियतले मैले जहिल्यै विचारको राजनीति गरेँ । मैले कहिल्यै दलगत राजनीतिको पक्षमा अकारण कुरालाई प्रश्रय दिइँन । अरुका राजनीतिक जोडघटाउमा आफूलाई सरिक गराइँन ।’ उनले थपे–‘तर आज एउटा उद्यमी, लगानीकर्ता र करदातामाथि राजनीतिकरण गर्ने काम भयो । यो गलत भयो ।’

एउटा कर्मठ उद्योगीमाथि आधारहीन ढंगले राज्यका निकायहरु परिचालन गरी बद्नाम गराइरहँदा र आफूमाथि बिनाकारण एक्सन लिँदा त्यसले नेपाल र विश्वभरका युवा उद्यमीको मनमा कस्तो सन्देश जाला भन्ने विषयमा हेक्का नराखिएको उनको भनाई थियो । ‘मैले मेरो चरित्रको सर्टिफिकेट अब स्टन्ट गर्नेहरुलाई बुझाउनुपर्दैन । राजनीतिको आफ्नो फोरम छ, म पनि नवलपरासीबाट प्रत्यक्ष निर्वाचित सांसद भएकोले यहिलेलाई यत्ति भन्न चाहन्छु ।’ उनले भने ।

जग्गा किनेको हो, कसरी ठगी भयो ?

बयानका क्रममा विनोद चौधरीले आफूहरुमाथि ठगी र किर्तेको आरोप लाग्नु नै गलत रहेको जिकिर गरेका थिए ।  

सीआईबी स्रोतका अनुसार उनले बाँसबासी छाला जुत्ता कारखानाको १० रोपनी जग्गा ठगी वा किर्ते गरेर नलिएको, बरु त्यसबेलाको चलनचल्तीभन्दा बढी मूल्य हालेर खरीद गरेको बताएका थिए ।  

त्यसबेला सरकारले नै सार्वजनिक आह्वान गरेपछि १८ रोपनी जग्गा किनेको समेत बयानका क्रममा बताएका छन् ।  

हामीले पैसा तिरेर जग्गा किन्दा कसरी ठगी र किर्ते भयो ? उनले अनुसन्धान अधिकृतहरुलाई प्रतिप्रश्न गर्दै भनेका स्रोतले जनाएको छ ।  

चौधरीले त्यसबेला ठमेल वरपरकै जग्गा रोपनीको १ लाख रुपैयाँमा आउने गरेको उल्लेख गर्दै साढे २ लाख रुपैयाँमा बाँसबारीको जग्गा किनेको र पैसा हालेर जग्गा किन्दा कसरी किर्ते भयो ? भनी पटक पटक प्रश्न गरेका थिए ।