आइटी क्रान्तिको ढोका खुल्यो: गभर्नर पौडेलको युवालाई सन्देश- 'अब पखेटा फैलाऊ'

काठमाण्डौ । नेपाल राष्ट्र बैंकका गभर्नर डा। विश्वनाथ पौडेलले नेपालको आइटी क्षेत्रले हालैका वर्षहरूमा उल्लेखनीय प्रगति गरेको बताउँदै युवा उद्यमीहरूलाई ढुक्क भएर नयाँ उत्पादन विकास गर्न र विश्व बजारमा प्रतिस्पर्धा गर्न आह्वान गरेका छन् ।  

आज बिहान सामाजिक सञ्जालमा आफ्नो स्टाटस मार्फत गभर्नर पौडेलले लेखेका छन्: 'पखेटा फैलाउनुस् ।' 

उनले विगत केही वर्षमा आइटी क्षेत्रले गरेको मेहनतको प्रशंसा गर्दै अर्थ मन्त्रालयले कम्पनी खोल्न सहज बनाउने, वैदेशिक लगानी (एफडीआई)मा सीमा संशोधन गर्ने र कर दर विश्वसनीय बनाउने जस्ता सुधारहरूको फलस्वरूप २ वर्षअघि करिब ४० वटा आइटी कम्पनीहरूमा वैदेशिक लगानी आएकोमा एक वर्षअघि लगभग ४०० कम्पनीहरू खुलेको उल्लेख गरे ।  

गभर्नर पौडेलले राष्ट्र बैंकमा आएपछि यी सुधारहरूलाई थप अघि बढाएको बताउँदै नेपाली निर्यातकर्ता कम्पनीहरूलाई विदेशमा एक मिलियन डलरसम्म लगानी गर्न अनुमति दिइएको र निर्यात नगर्ने कम्पनीहरूलाई पनि २० हजार डलरसम्म विदेश लगानी गर्न सहजीकरण गरिएको जानकारी दिए । 'यी सीमाहरू नतिजा हेरेर थप संशोधन गर्दै जाने कुरामा सबैलाई विश्वास दिलाउन चाहन्छु' -उनले भनेका छन् ।  

यसैगरी, वैदेशिक लगानीकर्ताहरूले पेपरवर्क धेरै भएको गुनासो गरेपछि नाफा लग्न राष्ट्र बैंकको स्वीकृति लिनुनपर्ने व्यवस्था गरिएको पनि उनले उल्लेख गरे ।  

गभर्नर पौडेलले नेपालमा २०२१ साल (सन् १९६४)मा नै वैदेशिक लगानीमा प्रतिबन्ध लगाइएको स्मरण गर्दै यी पहलहरूले देशमा दूरगामी असर पार्ने बताए । उनले युवाहरूलाई सम्बोधन गर्दै भने, 'ढुक्क भएर नयाँ प्रडक्ट निकाल्नुहोस्, विश्व बजारमा आँखा लगाउनुहोस् । पखेटा फैलाउनुहोस्, मेहनत गर्नुहोस्, नेपालबाटै जित्नलाई संसार हुनेछ । बैंकिङ क्षेत्रले तपाईंहरूको विस्तारमा सदैव साथ दिनेछ ।'

गभर्नर पौडेलको यो स्टाटसले नेपालको आइटी तथा स्टार्टअप क्षेत्रमा नयाँ ऊर्जा प्रदान गर्ने अपेक्षा गरिएको छ । हालैका वर्षहरूमा सरकार र राष्ट्र बैंकले गरेको सुधारले वैदेशिक लगानी आकर्षित गर्न महत्वपूर्ण भूमिका खेलेको छ ।