सन् २०२६ मा सुनको मूल्य प्रतिऔंस ५ हजार डलरसम्म पुग्ने प्रक्षेपण

काठमाण्डौ । स्विस बैंकिङ् कम्पनी युबीएसका कमोडिटी रणनीतिकारहरूले २०२६ सेप्टेम्बरसम्म सुनको मूल्य प्रतिऔंस ५ हजार डलर पुग्ने पूर्वानुमान गरेका छन्। बैंकका अनुसार, यदि अमेरिकी मध्यावधि निर्वाचन वा अन्य राजनीतिक तथा आर्थिक अस्थिरताहरू बढ्छन् भने सुनको मूल्य प्रतिऔंस ५ हजार ४०० डलरसम्म पुग्न सक्छ।

युबीएसले नयाँ रिपोर्टमा २०२६ को पहिलो तीन त्रैमासिकका लागि सुनको मूल्य लक्ष्य प्रतिऔंस ५ हजार डलर पुग्ने उल्लेख गरेको छ। वर्षको अन्त्यतिर, सुनको मूल्य अनुमानित रूपमा प्रतिऔंस ४ हजार ८०० डलरमा झर्ने अपेक्षा गरिएको छ ।

रिपोर्ट अनुसार, २०२६ मा सुनको माग निरन्तर बढ्ने छ। यसको मुख्य कारणहरूमा कम वास्तविक प्रतिफल, विश्वव्यापी आर्थिक चिन्ता, र अमेरिकी घरेलु नीतिगत अनिश्चितताहरूलाई प्रस्तुत गरिएको छ ।  

युबीएसका रणनीतिकारहरूले भनेका छन्, ‘यदि राजनीतिक वा वित्तीय जोखिम बढ्छ भने सुनको मूल्य प्रतिऔंस ५ हजार ४०० डलरसम्म पुग्न सक्छ, जुन पहिलेको ४ हजार ९०० डलरभन्दा बढी हो।’

नयाँ रिपोर्ट अनुसार, केन्द्रीय बैंक र लगानीकर्ताहरूको सुन खरिद पनि बढ्ने छ। यसबाहेक, अमेरिकी फेडरल रिजर्भको ब्याजदर कटौती, कम बोण्ड प्रतिफल, र अमेरिकी राजनीतिक अस्थिरताले सुनको मागलाई अझ प्रोत्साहित गर्ने अपेक्षा गरिएको छ।

विश्लेषकहरूले अमेरिकी वित्तीय दृष्टिकोण कमजोर हुने भएकाले केन्द्रीय बैंक र लगानीकर्ताहरूले सुनमा लगानी बढाउने विश्वास व्यक्त गरेका छन्।