मेटलाइफ नेपालद्वारा तीन नयाँ एजेन्सी कार्यालय सञ्चालन

काठमाण्डौ । मेटलाइफ नेपालले महोत्तरीको बर्दिबास, मोरङको पथरी तथा बागलुङमा तीन नयाँ एजेन्सी कार्यालय सञ्चालनमा ल्याएको छ। यस विस्तारसँगै कम्पनीले देशका विभिन्न क्षेत्रका समुदायसम्म वित्तीय सुरक्षाको पहुँच थप सुदृढ बनाएको जनाएको छ।

नयाँ एजेन्सी कार्यालयहरूको सञ्चालनले ती क्षेत्रका सर्वसाधारणलाई आफ्नै समुदायभित्र जीवन बीमासम्बन्धी परामर्श, समयमै सेवा तथा निरन्तर सहयोग प्राप्त गर्न सहज हुने मेटलाइफले विश्वास लिएको छ। यसअघि धेरै परिवार र साना व्यवसायका लागि जीवन बीमा सेवामा पहुँच गर्न टाढाका सहरसम्म जानुपर्ने अवस्था रहेको थियो।

मेटलाइफका अनुसार स्थानीय स्तरमै कार्यालय स्थापना भएपछि बीमासम्बन्धी जानकारीको अभाव कम हुनुका साथै ग्राहकहरूले आफ्ना आवश्यकता अनुसार व्यक्तिगत सल्लाह लिन सक्नेछन्। यसले वित्तीय योजना, जोखिम व्यवस्थापन तथा दीर्घकालीन सुरक्षामा सकारात्मक प्रभाव पार्ने अपेक्षा गरिएको छ।

यो विस्तारले वित्तीय सेवामा पहुँच बढाउनुका साथै स्थानीय स्तरमा रोजगारीका अवसर सिर्जना गर्ने र बीमा व्यवसायलाई करियरका रूपमा अघि बढाउन सहयोग पुर्‍याउने मेटलाइफको भनाइ छ। यसबाट क्षेत्रीय आर्थिक गतिविधि र वित्तीय साक्षरता अभिवृद्धिमा समेत योगदान पुग्ने विश्वास गरिएको छ।

विस्तारबारे धारणा राख्दै मेटलाइफ नेपालका महाप्रबन्धक निर्मल काजी श्रेष्ठले भने, ‘बर्दिबास, पथरी र बागलुङमा एजेन्सी कार्यालय सञ्चालन गर्नु भनेको समुदायस्तरमै वित्तीय सुदृढता मजबुत बनाउने प्रयास हो। जब वित्तीय सुरक्षा स्थानीय रूपमा उपलब्ध हुन्छ, तब परिवारहरूले भविष्यका लागि सचेत र आत्मविश्वासी निर्णय लिन सक्छन्।’

नेपालको अर्थतन्त्र क्रमशः विस्तार र विविधीकरण हुँदै गइरहेको सन्दर्भमा, सहज र भरपर्दो वित्तीय सुरक्षाको आवश्यकता बढ्दो रहेको मेटलाइफले जनाएको छ। रणनीतिक स्थानहरूमा एजेन्सी सञ्जाल विस्तार गर्दै कम्पनीले समावेशी विकासलाई सहयोग पुर्‍याउने र देशका सबै भू–भागका नागरिकले दीर्घकालीन वित्तीय सुरक्षाको लाभ लिन सकून् भन्ने लक्ष्य लिएको बताइएको छ।