सुनको मूल्यमा उच्च वृद्धि, भू–राजनीतिक तनावले आकर्षण बढ्दै

काठमाण्डौ । अन्तर्राष्ट्रिय बजारमा सुनको मूल्य उच्च वृद्धि भएको छ । आजको कारोबारमा सुनको भाउ १.५५ प्रतिशत अर्थात ७१ डलरले बढेको छ ।

यो समाचार तयार पार्दासम्म सुनको मूल्य प्रतिऔंस ४ हजार ६६० डलरमा कारोबार भईरहेको छ । यसअघि कारोबारमा दौरान सुनको मूल्य प्रतिऔंस ४ हजार ६७५ डलरसम्म पुगेर अल टाइम हाईको रेकर्ड बनाएको थियो ।

अमेरिकी राष्ट्रपति डोनाल्ड ट्रम्पले ग्रीनल्यान्डलाई अधिग्रहण गर्ने योजनाको विरोध गर्ने युरोपेली मुलुकहरूमा ट्यारिफ लगाउने घोषणा गरेपछि सुनको मूल्यमा उछाल आएको छ। बढ्दो भू–राजनीतिक तनावका कारण सुरक्षित लगानीको रूपमा मानिने सुनतर्फ लगानीकर्ताको आकर्षण बढेको हो।

राष्ट्रपति ट्रम्पले डेनमार्क, स्वीडेन, फ्रान्स, जर्मनी, नेदरल्यान्ड्स, फिनल्याण्ड, बेलायत र नर्वेबाट आयात हुने वस्तुहरूमा फेब्रुअरी १ देखि १० प्रतिशत ट्यारिफ लगाइने घोषणा गरेका छन्। ग्रीनल्यान्ड अमेरिकालाई बिक्री गर्न अनुमति नदिएसम्म ट्यारिफ लागू रहने उनले बताएका छन्।

यस कदमले युरोपबाट प्रतिशोधात्मक कारबाही हुन सक्ने आशंका बढाएको छ, जसले विश्व बजारमा अनिश्चितता सिर्जना गर्दै सुनजस्ता सुरक्षित सम्पत्तिलाई समर्थन गरेको छ।

यसैबीच, युरोपेली संघका राजदूतहरूले आइतबार ट्रम्पलाई ट्यारिफ नलगाउन दबाब दिने प्रयास तीव्र बनाउने विषयमा व्यापक सहमति जनाएका छन्। साथै, यदि ट्यारिफ लागू भएमा प्रतिकारात्मक कदम चाल्ने तयारी पनि गरिएको छ।

अर्कोतर्फ, अमेरिकाबाट सार्वजनिक भएका श्रम बजारसम्बन्धी सकारात्मक आर्थिक तथ्यांकले अमेरिकी केन्द्रीय बैंक (फेडरल रिजर्भ) ले छिट्टै ब्याजदर घटाउने सम्भावना घटाएको छ। फेड फन्ड्स फ्युचर्सका अनुसार अब अर्को ब्याजदर कटौतीको अपेक्षा जनवरी र अप्रिलबाट सरेर जुन र सेप्टेम्बरसम्म पुगेको छ।

फेडले ब्याजदर लामो समयसम्म उच्च राख्न सक्ने धारणा बलियो बन्दै जाँदा अमेरिकी डलरलाई समर्थन मिलेको छ, जसले ब्याज नआउने सम्पत्ति जस्तै सुनको मूल्यमा दबाब सिर्जना गर्ने कारक बनेको छ।