ट्रम्पद्वारा अमेरिकाको सबैभन्दा ठूलो बैंकविरुद्ध ५ अर्ब डलरको मुद्दा दायर, कारण यस्तो

काठमाण्डौ । अमेरिकी राष्ट्रपति डोनाल्ड ट्रम्पले देशको सबैभन्दा ठूलो बैंक जेपी मोर्गन चेजविरुद्ध ५ अर्ब अमेरिकी डलर क्षतिपूर्ति माग गर्दै मुद्दा दायर गरेका छन्। ट्रम्पले बैंकले राजनीतिक कारणले गैरकानुनी रूपमा आफ्ना बैंक खाता बन्द गरेको आरोप लगाएका छन्।

मुद्दामा बैंकका प्रमुख कार्यकारी अधिकृत (सीईओ) जेमी डिमनलाई समेत प्रतिवादी बनाइएको छ। ट्रम्पको दाबी अनुसार सन् २०२१ मा बैंकले अचानक उनका तथा उनका व्यवसायसँग सम्बन्धित खाता बन्द गरेपछि उनलाई ठूलो आर्थिक क्षति पुगेको र प्रतिष्ठामा गम्भीर आँच आएको छ।

जेपी मोर्गन चेजले ६ जनवरी २०२१ मा अमेरिकी क्यापिटल हिलमा भएको दंगापछि ती खाता बन्द गर्ने निर्णय गरेको थियो। उक्त दिन ट्रम्प समर्थकहरूले क्यापिटल भवनमा प्रवेश गरी राष्ट्रपति निर्वाचन परिणामको औपचारिक प्रमाणीकरण प्रक्रिया अवरुद्ध गर्ने प्रयास गरेका थिए।

बैंकका प्रवक्ताले भनेका छन्, ‘यो मुद्दाको कुनै कानुनी आधार छैन।’ उनका अनुसार जेपी मोर्गन चेजले राजनीतिक वा धार्मिक कारणले कहिल्यै खाता बन्द गर्दैन। बैंकले जारी गरेको विज्ञप्तिमा भनिएको छ, ‘कुनै खाता बैंकका लागि कानुनी वा नियामक जोखिम उत्पन्न गर्ने अवस्थामा मात्र खाता बन्द गरिन्छ।’