सुनको भाउ एकैदिन ९७ डलरले घट्यो, प्रतिऔंस कति पुग्यो ?

काठमाण्डौ । अन्तर्राष्ट्रिय बजारमा सुनको मूल्य ओरालो लाग्ने क्रम आजपनि जारी रहेको छ । आजको कारोबारमा सुनको मूल्य २.०५ प्रतिशत अर्थात ९७ डलरले घटेको छ ।

यो समाचार तयार पार्दासम्म सुनको मूल्य प्रतिऔंस ४ हजार ६५१ डलरमा सीमित बनेको छ । गत बिहिबार प्रतिऔंस ५ हजार ५९४ डलरको रेकर्डतोड उचाईमा पुगेपछि सुनको भाउ निरन्तर घटिरहेको छ ।

अमेरिकी राष्ट्रपति डोनाल्ड ट्रम्पले केन्द्रीय बैंक, फेडरल रिजर्भको अध्यक्षमा केभिन वार्सलाई मनोनयन गरेसँगै लगानीकर्ताले ब्याजदर कटौती हुने अपेक्षा गरेका छन् । यद्यपी वार्सका नीतिहरु डलरलाई समर्थन गर्ने प्रकृतिका हुने भएकाले सुनको मूल्य अझै खस्किने अनुमान विश्लेषकहरुले गरेका छन् ।

यस्तै आज चाँदीको भाउ भने बढेको छ । चाँदीको मूल्यमा आज ३.१५ प्रतिशत अर्थात २.०९ डलरको बढोत्तरी आएको छ । यससँगै चाँदीको भाउ ७८ डलर कायम भएको छ ।