सेयरबजारमा आक्रामक लगानी थप्दै बीमा कम्पनी, हिमालयन लाइफ इन्स्योरेन्सको मात्रै रु.१२.४७ अर्ब

काठमाण्डौ । बीमा कम्पनीहरुले सेयरबजारमा लगानी उल्लेख्य बढाएका छन् । नेपाल बीमा प्राधिकरणका अनुसार चालु आवको दोस्रो त्रैमाससम्म बीमा कम्पनीहरुले सेयरबजारमा कुल ५२ अर्ब ६२ करोड ८७ लाख रुपैयाँ लगानी गरेका छन् ।

यो लगानी गत आवको सोही अवधिसम्मको तुलनामा ५७.८७ प्रतिशत बढी हो । गत आवको दोस्रो त्रैमाससम्म बीमा कम्पनीहरुले सेयरबजारमा ३३ अर्ब ३३ करोड ७७ लाख रुपैयाँ बराबरको लगानी गरेका थिए ।  

प्राधिकरणको तथ्याङ्कअनुसार बीमा कम्पनीहरुले सेयरबाजरमा आक्रामक रुपमा लगानी बढाएका छन् । बैंकहरुको ब्याजदर निरन्तर घट्दै गएपछि बीमकहरुले मुद्दती निक्षेपको रकम सेयरबजारतर्फ लगानीको रुपमा सिफ्ट गरेका छन् ।

केही वर्षअघिसम्म बीमा कम्पनीहरु सेयरबजारमा लगानी गर्न वा लगानी बढाउन असुरक्षित महसुस गर्दथे । बैंकहरुको मुद्दतीमा पैसा राख्दा केही प्रतिशत भएपनि ब्याजको रुपमा रिटर्न पाउने हुँदा बीमा कम्पनीहरुले ८० प्रतिशत भन्दा बढी रकम मुद्दतीमा नै थुपार्ने गर्थे । तर पछिल्लो केही समययता बैंकहरुको मुद्दती निक्षेपको ब्याजदर क्रमिक रुपमा घट्न थालेपछि बीमकहरु लगानीको नयाँ उपकरण नपाएपछि सेयरबजारतर्फ सिफ्ट हुन थालेका छन् ।

प्राधिकरणले बीमकहरुको लगानीमा थप सहजता अपनाउँदै सेयरबजारमा गर्ने लगानीको सीमा समेत बढाईदिएको छ । गत वर्षसम्म सूचीकृत पब्लिक कम्पनीको सेयरमा लगानी गर्दा सम्बधित कम्पनीको कायम चुक्तापूँजीको ५ प्रतिशतसम्म लगानी गर्न पाउने व्यवस्था रहेकोमा प्राधिकरणले लगानी दायरा बढाएर १५ प्रतिशतसम्म लगानी गर्न पाउने व्यवस्था गरेको छ । यसकारण पनि बीमा कम्पनीहरुको सेयरबजारमा लगानी आक्रामक देखिएको हो ।

सो अवधिसम्म जीवन बीमा कम्पनीहरुले मात्रै सेयरबजारमा ४२ अर्ब ४० करोड ३१ लाख रुपैयाँ बराबरको लगानी गरेका छन् । यो रकम गत आवको सोही अवधिसम्मको तुलनामा ६४.५४ प्रतिशत बढी हो । गत आवको दोस्रो त्रैमाससम्म बीमा कम्पनीहरुले सेयरबजारमा २५ अर्ब ७७ करोड ७ लाख रुपैयाँ लगानी गरेका थिए ।  

सो अवधिसम्म राष्ट्रिय जीवन बीमा कम्पनी बाहेक सबैले उल्लेख्य लगानी बढाएका छन् । सबैभन्दा धेरै सेयरबजारमा लगानी गर्ने कम्पनीमा हिमालयन लाइफ रहेको छ । कम्पनीले सेयरबजारमा मात्रै १२ अर्ब ४७ करोड रुपैयाँ लगानी गरेको छ ।  

त्यस्तै, गत आवको तुलनामा सबैभन्दा बढी लगानी थप्ने कम्पनीमा भने सानिमा रिलायन्स लाइफ रहेको छ । यो कम्पनीले सेयरबजारमा १७५.१९ प्रतिशतले लगानी बढाएको छ ।  

त्यस्तै, निर्जीवन बीमा कम्पनीहरुले पनि दोस्रो त्रैमाससम्म उल्लेख्य लगानी बढाएका छन् । सो अवधिसम्म १२ निर्जीवन बीमकले सेयरबजारमा ५ अर्ब ३६ करोड ८ लाख रुपैयाँ लगानी गरेका छन् । यो लगानी रकम गत आवको सोही अवधिसम्मको तुलनामा २२.१० प्रतिशत बढी हो । गत आवको सोही अवधिसम्म निर्जीवन बीमकहरुले सेयरबजारमा ४ अर्ब ३९ करोड ७ लाख रुपैयाँ लगानी गरेका थिए ।  

दोस्रो त्रैमाससम्म आइजीआई प्रुडेन्सियल, सानिमा जिआइसी र प्रभु इन्स्योरेन्सको लगानी घटेको छ भने बाँकी सबैको उल्लेख्य बढेको छ । सबैभन्दा बढी सेयरबजारमा लगानी गर्ने कम्पनीमा राष्ट्रिय बीमा कम्पनी रहेको छ । यो कम्पनीले ७९ करोड ४१ लाख रुपैयाँ सेयरबजारमा लगानी गरेको छ ।  

सबैभन्दा बढी लगानी बढाउने कम्पनीमा भने युनाइटेड अजोड इन्स्योरेन्स रहेको छ । कम्पनीले १२५.९८ प्रतिशतले लगानी थपेको छ ।  

यता लघुबीमा कम्पनीहरुले झण्डै शतप्रतिशतले सेयरबजारमा लगानी बढाएका छन् । सो अवधिसम्म लघुबीमकहरुको सेयरबजारमा लगानी १४ करोड ८३ लाख रुपैयाँ पुगेको छ । यो रकम गत आवको सोही अवधिसम्मको तुलनामा ९७.७८ प्रतिशत बढी हो ।

साथै पुनर्बीमा कम्पनीहरुको पनि सेयरबजारमा लगानी ५२.०८ प्रतिशत वृद्धि भएको छ । गत आवको दोस्रो त्रैमाससम्म ३ अर्ब १० करोड १२ लाख रुपैयाँ लगानी रहेकोमा चालु आवको सोही अवधिसम्म बढेर ४ अर्ब ७१ करोड ६३ लाख रुपैयाँ पुगेको छ । दुई पुनर्बीमामध्ये नेपाल रि इन्स्योरेन्सको यो सेक्टरमा लगानी तटस्थ रहेको छ भने हिमालयन रि इन्स्योरेन्सले मात्रै उल्लेख्य बढाएको छ ।