अमेरिका–इरान युद्ध चर्किँदै जाँदा कच्चा तेलको मूल्य बढेको बढ्यै !

अमेरिका र इरानबीचको तनाव युद्धको रूप लिँदै गएपछि विश्व ऊर्जा बजारमा ठूलो प्रभाव देखिएको छ। विशेषगरी हर्मुज जलडमरूमध्यबाट हुने तेल ढुवानीमा तीव्र गिरावट आएपछि कच्चा तेलको मूल्य पुनः बढ्न थालेको छ।

अन्तर्राष्ट्रिय बजारमा ब्रेन्ट क्रूडको मूल्य करिब २.६७ प्रतिशत बढेर प्रति ब्यारेल ८३.५७ डलर पुगेको छ भने डब्ल्यूटीआई क्रूड ३.१५ प्रतिशत बढेर ७७.०१ डलर प्रति ब्यारेलमा कारोबार भइरहेको छ। इरानमाथि अमेरिका र इजरायलले आक्रमण गरेयता तेलको मूल्य १५ प्रतिशतभन्दा बढीले बढिसकेको छ।

युद्धका कारण हर्मुज जलडमरूमध्यमा ट्यांकर आवागमनमा करिब ९२ प्रतिशत गिरावट आएको बताइएको छ। विश्वको करिब २० प्रतिशत कच्चा तेल यही मार्ग हुँदै आपूर्ति हुने भएकाले ढुवानी अवरुद्ध हुँदा बजारमा दबाब बढेको छ।

यसैबीच इरानले उत्पादनमा दैनिक करिब १५ लाख ब्यारेल कटौती गरेको जनाएको छ। भण्डारण अभाव र वैकल्पिक निर्यात मार्ग नहुँदा उत्पादन घटाउनुपरेको इरानी अधिकारीहरूले बताएका छन्।

जेपी मोर्गनका अनुसार खाडी क्षेत्रमा करिब ३२९ तेल ट्यांकर रोकिएका छन्। डीबीएस बैंकले भने पश्चिम एसियाको संकट लामो समयसम्म जारी रहे कच्चा तेलको मूल्य प्रति ब्यारेल १५० डलरसम्म पुग्न सक्ने चेतावनी दिएको छ।

इरान संकटपछि अन्तर्राष्ट्रिय बजारमा तेलको मूल्य एक वर्षयताकै उच्च स्तरमा पुगेको छ। हर्मुज जलडमरूमध्य ३३ किलोमिटर चौडा र १६७ किलोमिटर लामो रहेको छ र विश्वका प्रमुख ऊर्जा आपूर्ति मार्गमध्ये एक मानिन्छ।