.gif)
_(1).gif)
.png)
काठमाण्डौं । पछिल्लो समय सेयर बजार निरन्तर घटिरहे पनि केही कम्पनीका लगानीकर्ताले भने कुस्त कमाइरहेका छन् । दोस्रो बजारमा यस्तै एउटा कम्पनी छ: गुराँस लघुवित्त । पछिल्लो समय गुराँस लघुवित्तको सेयरमूल्य ह्वात्तै बढेको(बढाइएको) छ । यो कम्पनीको सेयरमूल्य तीन महिनामा बिना कुनै कारण तीन गुणाले वृद्धि भइसकेको छ ।
स्रोतले दिएको जानकारीअनुसार यो कम्पनीमा केही ठाटाबाठा लगानीकर्ताहरुले चलखेल गरेका छन् । चलखेल गर्ने गिरोहले यो कम्पनीको सेयरमूल्य खुलेआम उचालिरहँदा समेत नियामकहरु तै चूप मै चूप छन् ।
कम्पनीको दोस्रो बजारमा थोरै संख्यामा कित्ताहरु रहेको फाइदा उठाउँदै केही गिरोहले चलखेल गरिरहेको स्रोतको बताउँछ । अन्य कुनै गतिलो बाहाना नरहेकै अवस्थामा रकेटको गतिमा सेयरमूल्य बढाइनुले पनि स्रोतको दाबी पुष्टि गर्छ ।
गत डिसेम्बरमा ६ सय रुपैयाँ आसपास सेयरमूल्य भएको यो कम्पनीको सेयरमूल्य अहिले २ हजार हाराहारी पुगेको छ । आज यो कम्पनीको सेयरमूल्य ९.९७ प्रतिशतले बढाएर प्रतिकित्ता १ हजार ९७६ रुपैयाँमा कायम भएको छ । अघिल्लो दिन पनि कम्पनीको सेयरमूल्यमा सकारात्मक सर्किट लागेको थियो ।
यसरी सेयरमूल्य बढ्नुमा कुनै खास कारण नभए पनि केहि खेलाडीले मूल्य बढाएर फाइदा लिइरहेका र त्यस्ता गिरोहले रचेको जालमा सोझा सिधा फसिरहेका प्रष्ट देख्न सकिन्छ ।
अन्य लघुवित्तको सेयर भाउ सामान्य रुपमा मात्रै पनि बढ्न नसक्दा यो कम्पनीको सेयरभाउ अस्वभाविक रुपले उचालिएको छ ।
कम्पनीको चुक्ता पूँजी कम भएको कारण नै यसरी मूल्य उचालिएको बजारमा केही लगानीकर्ताहरुले आरोप लगाएका छन् । कम्पनीको चुक्तापूँजी जम्मा १० करोड १४ लाख रुपैयाँ मात्रै रहेको छ ।जसमा संस्थापकको स्वामित्व ६७.७४ प्रतिशत रहेको छ भने सर्वसाधारणतर्फ ३२.२६ प्रतिशत रहेको छ । दोस्रो बजारमा कम्पनीको करिब ३ लाख कित्ता सेयरमात्रै कारोबारमा छ ।
यसरी न्यून सेयर संख्या भएको फाइदा उठाउँदै केहि लगानीकर्ताले कम्पनीहरुको सेयरमूल्यमा चलखेल गरिरहेका छन् । यो कम्पनीको वित्तीय अवस्था नियाल्दा खासै राम्रो भने देखिदैन । कम्पनीको प्रतिसेयर आम्दानी १५.२४ रुपैयाँ रहेको छ ।
त्यस्तै कम्पनीको बुक भ्यालु १२९.६६ रुपैयाँ रहेको छ । कम्पनीको खराब कर्जा अनुपात ३.७५ प्रतिशत छ ।
यसलाई प्रतिनिधि घटनाको रुपमा लिन सकिन्छ । बजारमा यस्ता अन्य कम्पनीहरु पनि छन्, जसमा केहि ठाटाबाठा लगानीकर्ताले चलेखेल गर्दै आएका छन् । यसले कमजोर कम्पनीको सेयरमूल्य उचालिने र तुलनात्मक रुपमा राम्रो वित्तीय अवस्था भएका कम्पनीका सेयरमूल्य भने खासै नबढ्ने देखिएको छ ।
.gif)
.png)
.jpg)
.png)
.jpg)
.gif)
.gif)
.gif)
