राजीनामाको नाटक कि रणनीति? कांग्रेसभित्र गगन–विश्वप्रकाशको नयाँ खेल

काठमाण्डौ । प्रतिनिधिसभा निर्वाचन–२०८२ अन्तर्गत फागुन २१ गते भएको चुनावमा अप्रत्याशित हार व्यहोरेपछि नेपाली कांग्रेसका सभापति गगनकुमार थापाले उपसभापति विश्वप्रकाश शर्मामार्फत राजीनामा बुझाएको खबर बाहिरिएसँगै पार्टीभित्रको राजनीति थप तरंगित बनेको छ ।

उक्त विषयलाई औपचारिक रूपमा टुंग्याउन भन्दै शुक्रबार केन्द्रीय कार्यसमितिको बैठक बोलाइएको छ । स्रोतका अनुसार सो बैठकमा थापा स्वयं उपस्थित नहुनेछन् भने बैठकको अध्यक्षता उपसभापति शर्माले गर्ने तयारी छ ।

बैठकमा शर्माले थापाको राजीनामाबारे औपचारिक जानकारी गराउँदै त्यसलाई अस्वीकार गर्ने प्रस्ताव समेत पेश गर्ने तयारी रहेको बताइएको छ । पार्टीभित्रको एक धारका अनुसार निर्वाचनमा भएको पराजय कुनै एक व्यक्तिको जिम्मेवारी मात्र नभई समग्र परिस्थितिको परिणाम भएको तर्क अघि सार्दै राजीनामा अस्वीकार गर्ने वातावरण बनाइएको छ ।

तर, घटनाक्रमलाई नजिकबाट नियालिरहेका नेताहरू र विश्लेषकहरू भने यसलाई ‘पूर्वनियोजित राजनीतिक रणनीति’को रूपमा हेर्न थालेका छन् । निर्वाचन परिणाम सार्वजनिक भएपछि काठमाडौंको एक होटलमा थापा र शर्मा बीच भएको भेटघाटलाई लिएर त्यतिबेलै राजीनामाको संकेत भएको चर्चा चलेको थियो ।

कतिपयको बुझाइमा, चुनावी हारपछि नैतिक जिम्मेवारी नलिएको भन्ने आलोचनाबाट बच्न थापाले राजीनामा दिएको सन्देश दिन खोजिएको हो । तर, अन्ततः केन्द्रीय कार्यसमितिबाटै उक्त राजीनामा अस्वीकार गराउने योजनाबद्ध अभ्यास भएको आशंका गरिएको छ ।

विशेष महाधिवेशनबाट सभापतिमा निर्वाचित भएका थापाले त्यसपछिको केन्द्रीय कार्यसमितिमा आफू निकटका नेताहरूलाई प्राथमिकता दिएको आरोप समेत लाग्दै आएको छ । उक्त महाधिवेशनमा तत्कालीन सभापति शेरबहादुर देउवा र वरिष्ठ नेता डा. शेखर कोइराला पक्षको असहमति रहेकाले वर्तमान कार्यसमिति संरचना नै थापामुखी रहेको दाबी गरिन्छ ।

यही संरचनाको आधारमा राजीनामा अस्वीकार गराएर आफूले नैतिक जिम्मेवारी लिएको देखाउने र नेतृत्वमा निरन्तरता कायम राख्ने ‘दुई धारको रणनीति’ अपनाइएको हुनसक्ने विश्लेषण पनि भइरहेको छ ।

यद्यपि, कांग्रेसका आधिकारिक स्रोतहरू भने यस्तो दाबीलाई अस्वीकार गर्दै निर्वाचन समीक्षा, प्राप्त प्रतिवेदन र समग्र राजनीतिक परिस्थितिको आधारमा निर्णय हुने बताउँदै आएका छन् ।

यसबीच, निर्वाचनपछि देशभरका क्षेत्रबाट संकलित प्रतिवेदनको साझा निष्कर्ष पनि बैठकमा प्रस्तुत गरिने र त्यसैको आधारमा आगामी कदम तय गरिने जनाइएको छ । अब केन्द्रीय कार्यसमितिको निर्णयले कांग्रेसभित्रको नेतृत्व बहसलाई कुन दिशामा लैजान्छ भन्नेमा चासो केन्द्रित भएको छ ।