इरानले युद्ध अन्त्यका लागि राख्यो ५ कडा शर्त, तनाव झन् बढ्ने संकेत

काठमाण्डौ । इरानले जारी युद्ध अन्त्य गर्न अमेरिकाले अघि सारेको प्रस्ताव ठाडै अस्वीकार गरेको छ। इरानको सरकारी सञ्चारमाध्यम प्रेस टिभीले एक ‘वरिष्ठ राजनीतिक–सुरक्षा अधिकारी’लाई उद्धृत गर्दै यस्तो जानकारी दिएको हो।

प्रेस टिभीका अनुसार ती अधिकारीले इरानले आफ्नो निर्णय र सर्तअनुसार मात्रै युद्ध अन्त्य गर्ने स्पष्ट पारेका छन्। “इरानले युद्ध अन्त्य गर्ने समय र तरिका स्वयं तय गर्छ, र त्यो पनि आफ्नै सर्त पूरा भएपछि मात्रै सम्भव हुन्छ,” उनले भनेका छन्। यद्यपि उक्त अधिकारीको नाम, पद वा हैसियत सार्वजनिक गरिएको छैन।

इरानी अधिकारीहरूले यसअघि पनि केवल अस्थायी युद्धविराम नभई युद्धको पूर्ण अन्त्य चाहेको बताउँदै आएका छन्।

प्रेस टिभीका अनुसार इरानले युद्ध अन्त्यका लागि पाँच प्रमुख सर्त अघि सारेको छः

-शत्रुपक्षबाट हुने सबै प्रकारका ‘आक्रमण र हत्या’ पूर्ण रूपमा बन्द हुनुपर्ने

-इस्लामिक गणतन्त्र इरानमाथि पुनः युद्ध थोपर्न नपाइने सुनिश्चित गर्न ठोस संयन्त्र स्थापना गरिनुपर्ने

-युद्धबाट भएको क्षति र नोक्सानीको स्पष्ट तथा सुनिश्चित क्षतिपूर्ति भुक्तानी हुनुपर्ने

-क्षेत्रभर सक्रिय सबै प्रतिरोध समूहसहित सबै मोर्चामा युद्धको पूर्ण अन्त्य हुनुपर्ने

-Strait of हर्मुजमाथि आफ्नो सार्वभौम अधिकार प्रयोग गर्ने इरानको अधिकारलाई अन्तर्राष्ट्रिय मान्यता र ग्यारेन्टी दिइनुपर्ने

यसैबीच, प्रेस टिभीले वाशिङ्टनले विभिन्न कूटनीतिक माध्यममार्फत वार्ता अघि बढाउने प्रयास गरिरहेको उल्लेख गरेको छ। तर तेहरानले अमेरिकी प्रस्तावलाई ‘अत्यधिक’ भन्दै अस्वीकार गरेको जनाएको छ।

अहिलेसम्म दुवै पक्षबीच तनाव उच्च रहँदा युद्ध अन्त्यको सम्भावना अझै अनिश्चित देखिएको छ।

Source : BBC