ईसेवा मनि ट्रान्सफर र मलेसियाको मर्चेन्ट्रेड एशिया बीच रेमिट्यान्स भुक्तानी सम्झौता

काठमाण्डौ । नेपालको अग्रणी डिजिटल रेमिट्यान्स सेवा प्रदायक ईसेवा मनि ट्रान्सफर र मलेसियामा अवस्थित मर्चेन्ट्रेड एशिया बीच रेमिट्यान्स भुक्तानी सेवा प्रदान गर्ने सम्बन्धमा सम्झौता सम्पन्न भएको छ ।  

यस सहकार्यले मलेसियामा कार्यरत नेपालीहरूलाई सुरक्षित र अत्याधुनिक प्रविधिमार्फत नेपालमा रकम पठाउन नयाँ ढोका खोलेको छ ।

उक्त सम्झौतासँगै,मलेसियामा रहेका नेपालीहरूले मर्चेन्ट्रेडको सञ्जाल र डिजिटल प्लेटफर्म प्रयोग गरी पठाएको रकम नेपालमा रहेका आफन्तले तुरुन्तै प्राप्त गर्न सक्नेछन् ।  

सम्झौता पत्रमा ईसेवा मनि ट्रान्सफरका प्रमुख कार्यकारी अधिकृत अजेश कोईराला र मर्चेन्ट्रेडका प्रबन्ध निर्देशक रामासमी के. वीरनले हस्ताक्षर गरेका हुन । अब मलेसियामा बसोबास गर्ने नेपालीहरूले मर्चेन्ट्रेड मार्फत नेपालमा रहेका आफ्ना परिवारजनलाई ईसेवा मनि ट्रान्सफरको माध्यमबाट सजिलै रेमिट्यान्स पठाउन सक्नेछन् ।

सम्झौताबारे प्रतिक्रिया दिँदै ईसेवा मनि ट्रान्सफरका प्रमुख कार्यकारी अधिकृत अजेश कोईरालाले भने, ‘मलेसियाको अग्रणी वित्तीय संस्था मर्चेन्ट्रेडसँगको यो सहकार्य हाम्रा लागि अत्यन्तै महत्त्वपूर्ण छ । 

अब मलेसियाबाट नेपालमा रेमिट्यान्स पठाउने प्रक्रिया अझ सरल, छरितो र भरपर्दो बनाउनेछ । ‘एक्स्ट्रा ह्याप्पिनेस विथ एभ्रि ट्रान्सफर’ अफरमार्फत नेपाली श्रमिकहरूलाई आफ्नो मेहेनतको कमाइ घर पठाउँदा खुसी प्रदान गर्नेछ भन्ने हाम्रो विश्वास छ । यो साझेदारीले नेपाली आप्रवासीहरूलाई सजिलो सहज वित्तीय पहुँच सुनिश्चित गर्नुका साथै नेपालमा वित्तीय समावेशीकरणमा समेत महत्वपूर्ण योगदान पुर्याउनेछ ।”

ईसेवा मनि ट्रान्सफरले परम्परागत र डिजिटल माध्यममार्फत इसेवा वालेट, बैंक तथा वित्तीय संस्थाहरू र आफ्ना भुक्तानी केन्द्रहरू प्रयोग गरी देशव्यापी रेमिट्यान्स सेवा प्रदान गर्दै आइरहेको छ । सन् २०१९ मा नेपाल राष्ट्र बैंकबाट इजाजत प्राप्त यो संस्था एफवान सफ्ट ग्रुपअन्तर्गतको एक भगिनी कम्पनी हो, जसले २ करोडभन्दा बढी व्यक्तिहरू र १ लाख ३० हजारभन्दा बढी संस्थाहरूलाई फिनटेक समाधानमार्फत सशक्त बनाउँदै आएको छ ।

मर्चेन्ट्रेड एशिया मलेसियास्थित एक प्रमुख वित्तीय सेवा प्रदायक कम्पनी हो, जसले रेमिट्यान्स, डिजिटल भुक्तानी, मुद्रा सटही, र सीमापार वित्तीय समाधान प्रदान गर्दै आएको छ । यसले छिटो, सुरक्षित, र भरपर्दो वित्तीय सेवा प्रवाहलाई आफ्नो प्राथमिकतामा राख्दै आएको छ ।