इम्पेयरमेन्ट चार्ज बढ्दा कालिका लघुवित्तको नाफा ७८.३६% ले घट्यो, इपीएस कति ?

काठमाण्डौ । कालिका लघुवित्त वित्तीय संस्था लिमिटेडको नाफामा गिरावट आएको छ । संस्थाले चालु आवको तेस्रो त्रैमाससम्म १ करोड ४७ लाख १४ हजार रुपैयाँ नाफा कमाएको छ ।  

यो नाफा गत आवको सोही अवधिसम्मको तुलनामा ७८.३६ प्रतिशत कम हो । गत आवको सोही अवधिसम्म संस्थाले ६ करोड ८० लाख रुपैयाँ नाफा कमाएको थियो । 

संस्थाको इम्पेयरमेन्ट चार्ज ह्वात्तै बढ्दा नाफामा गिरावट आएको छ । संस्थाले तेस्रो त्रैमाससम्म १५ करोड ३६ लाख रुपैयाँ इम्पेयरमेन्ट चार्ज तिरेको छ । यो चार्ज गत आवको सोही अवधिसम्मको तुलनामा २२३६.५० प्रतिशत बढी हो । गत आवको तेस्रो त्रैमाससम्म संस्थाले जम्मा ६५ लाख ७५ हजार रुपैयाँ मात्रै यस्तो चार्ज तिरेको थियो ।  

संस्थाको खुद ब्याज आम्दानीमा भने सामान्य सुधार देखिएको छ । गत आवको चैत मसान्तसम्म २६ करोड ८१ लाख रुपैयाँ ब्याज आम्दानी गरेको यो संस्थाले चालु आवको चैत मसान्तसम्म३३ करोड २३ लाख रुपैयाँ ब्याज आम्दानी गरेको छ ।  

संस्थाको खराब कर्जा अनुपात पनि ५.२७ प्रतिशतबाट बढेर १४.१४ प्रतिशत पुगेको छ भने पूँजीकोष अनुपात १०.४५ प्रतिशत र सीडी रेसियो १११.८८ प्रतिशत पुगेको छ ।  

साथै संस्थाको इपीएस २२.२४ रुपैयाँबाट घटेर ४.३७ रुपैयाँ सीमित भएको छ भने प्रतिशेयर नेटवर्थ १५४.९६ रुपैयाँ, मूल्य आम्दानी अनुपात २०९.३८ गुणा, तरलता अनुपात १०.७८ प्रतिशत रहेको छ ।  

सो अवधिसम्म संस्थाको वितरणयोग्य मुनाफा जम्मा ८ लाख ८ हजार रुपैयाँ छ, यसर्थ लघुवित्तको लाभांश क्षमता ०.२४ प्रतिशत रहेको छ ।