ट्रम्पद्वारा इरानको युद्ध अन्त्य प्रस्ताव अस्वीकार

काठमाण्डौ । अमेरिकी राष्ट्रपति डोनाल्ड ट्रम्पले इरानले पठाएको युद्ध अन्त्यसम्बन्धी प्रस्तावलाई पूर्ण रूपमा अस्वीकार्य बताएका छन्। उनले आफ्नो सामाजिक सञ्जाल प्लेटफर्म ट्रुथ सोसलमा प्रतिक्रिया दिँदै इरानका भनिएका प्रतिनिधिहरूबाट आएको प्रस्ताव आफूलाई स्वीकार्य नभएको उल्लेख गरेका हुन्।

इरानको अर्ध–सरकारी समाचार संस्था तास्निम न्यूज एजेन्सीका अनुसार उक्त प्रस्ताव पाकिस्तानमार्फत अमेरिकासम्म पुर्‍याइएको थियो। पाकिस्तानले पछिल्ला दिनहरूमा अमेरिका–इरान तनाव कम गर्न मध्यस्थकर्ताको भूमिका निर्वाह गरिरहेको बताइएको छ।

प्रस्तावमा सबै मोर्चामा तत्काल युद्धविराम लागू गर्ने, अमेरिकी नौसैनिक नाकाबन्दी हटाउने तथा भविष्यमा इरानमाथि थप सैन्य आक्रमण नगर्ने सुनिश्चितता माग गरिएको थियो।

यसअघि टेलिभिजन नेटवर्क अल जजिरालाई इरानी अधिकारीहरूले उक्त प्रस्तावलाई व्यावहारिक र सकारात्मक प्रयासको रूपमा व्याख्या गरेका थिए।

हाल अमेरिका र इरानबीच अस्थायी युद्धविराम कायम रहे पनि दीर्घकालीन शान्ति सम्झौताबारे अझै सहमति हुन सकेको छैन। दुवै पक्षबीच सुरक्षा, सैन्य गतिविधि तथा आणविक कार्यक्रमसम्बन्धी विषयमा मतभेद कायम रहेको अन्तर्राष्ट्रिय सञ्चारमाध्यमहरूले जनाएका छन्।