(2).gif)
.png)
काठमाण्डौं । प्रमुख प्रतिपक्षी दल नेपाली कांग्रेसले सरकारको नीति तथा कार्यक्रम प्रस्तुत गर्ने महत्वपूर्ण संवैधानिक अवसरका क्रममा देखिएको घटनाप्रति आपत्ति जनाउँदै प्रधानमन्त्री बालेन शाहसँग औपचारिक स्पष्टिकरण माग गरेको छ।
प्रतिनिधिसभाको बैठकमा बोल्दै कांग्रेसकी प्रमुख सचेतक वासना थापाले राष्ट्रपति रामचन्द्र पौडेलले सरकारको नीति तथा कार्यक्रम वाचन गरिरहँदा प्रधानमन्त्रीले देखाएको व्यवहार अस्वाभाविक र असम्मानजनक रहेको दाबी गरिन्।
उनले यस्तो व्यवहारलाई सामान्य घटना भनेर व्याख्या गर्न नसकिने बताउँदै यसलाई गम्भीर संवैधानिक मर्यादा उल्लंघनको रूपमा मूल्याङ्कन गर्नुपर्ने धारणा राखिन्।
थापाले संसदभित्र भएको उक्त घटनालाई हल्का रूपमा लिनु उचित नहुने भन्दै कडा टिप्पणी गरिन्।
“यो सामान्य दृश्य होइन। संवैधानिक मर्यादा उल्लंघनको विषयलाई सामान्यीकरण गर्न मिल्दैन,” उनले भनिन्, “पदको गरिमा मात्र होइन, संवैधानिक मर्यादा र जनविश्वास पनि उत्तिकै महत्वपूर्ण हुन्छ।
यस्ता घटना दोहोरिन दिनु हुँदैन, यसले राज्यका संस्थागत मर्यादामाथि प्रश्न उठाउँछ।”
उनले थप भनिन् कि संसद र सरकारबीचको सम्बन्धमा देखिने यस्ता व्यवहारले लोकतान्त्रिक अभ्यासमाथि नै नकारात्मक प्रभाव पार्न सक्ने भएकाले यसको जवाफदेहिता अनिवार्य छ।
सोही आधारमा उनले प्रधानमन्त्री बालेन शाहलाई प्रतिनिधिसभामा उपस्थित भई घटनाबारे स्पष्ट र औपचारिक जवाफ दिनुपर्ने माग राखिन्।
सोमबारको उक्त घटनामा राष्ट्रपति रामचन्द्र पौडेलले सरकारको नीति तथा कार्यक्रम प्रस्तुत गरिरहेका बेला प्रधानमन्त्री बालेन शाह बीचमै बैठक कक्षबाट उठेर बाहिरिएका थिए।
उक्त दृश्य सार्वजनिक भएपछि राजनीतिक वृत्तमा चासो र बहस बढेको छ।
यससँगै प्रधानमन्त्रीले उक्त अवसरमा लगाएको पोशाकबारे पनि विभिन्न टिप्पणी र आलोचना भइरहेका छन्, जसले घटनालाई थप चर्चामा ल्याएको छ।
.png)
.jpg)
