बुंगल हाइड्रोः दोस्रो त्रैमासको नाफा तेस्रोमा गायब, १०० रुपैयाँको आईपीओको बुक भ्यालु झरेर ८४ मा सीमित

काठमाण्डौ । तत्कालीन नेपाल धितोपत्र बोर्ड अध्यक्ष सन्तोषनारायण श्रेष्ठ परिवारको समेत लगानी रहेको बुंगल हाइड्रो लिमिटेड आईपीओ निष्कासनपछि नै कमजोर वित्तीय अवस्थामा पुगेको देखिएको छ ।

कम्पनीले सार्वजनिक निष्कासनअघि प्रस्तुत गरेको प्रक्षेपण र वास्तविक वित्तीय अवस्थाबीच ठूलो अन्तर देखिएको हो । चालु आर्थिक वर्षको तेस्रो त्रैमाससम्म आइपुग्दा कम्पनी करिब ४९ लाख रुपैयाँ खुद घाटामा पुगेको वित्तीय विवरणले देखाएको छ ।

यससँगै कम्पनीको प्रतिसेयर आम्दानी (इपीएस) समेत ०.५९ रुपैयाँले नेगेटिभ बनेको छ । दोस्रो त्रैमाससम्म २ करोड ७७ लाख रुपैयाँ नाफामा रहेको कम्पनी तेस्रो त्रैमासमा एकाएक घाटामा फर्किनु लगानीकर्तामाझ थप चासोको विषय बनेको छ ।

यद्यपि, अघिल्लो आर्थिक वर्षको यही अवधिसम्म कम्पनी ४ करोड ७० लाख रुपैयाँ घाटामा रहेकाले तुलनात्मक रूपमा घाटा घटेको देखिन्छ । तर पछिल्लो त्रैमासमा आएको तीव्र गिरावटले कम्पनीको आम्दानीभन्दा खर्चको दबाब उच्च रहेको संकेत गरेको विश्लेषण गरिएको छ ।

कम्पनीले समीक्षा अवधिसम्म २३ करोड ६६ लाख रुपैयाँ आम्दानी गरेको छ । आम्दानी बढे पनि वित्त खर्च अनियन्त्रित बन्दा कम्पनीको समग्र वित्तीय अवस्था कमजोर बनेको देखिन्छ । तेस्रो त्रैमाससम्म मात्रै कम्पनीको वित्त खर्च ११ करोड ८९ लाख रुपैयाँ पुगेको छ । सञ्चालन तथा कर्मचारी व्यवस्थापन खर्च पनि निरन्तर बढिरहेको वित्तीय विवरणमा उल्लेख छ ।

त्यसमाथि, कम्पनीको कुल दायित्व २ अर्ब २९ करोड रुपैयाँभन्दा माथि पुगेको छ । उच्च ऋणभार र वित्त खर्चकै कारण नाफा टिकाउन नसकेको देखिन्छ ।

कम्पनी घाटामा गएसँगै प्रतिसेयर नेटवर्थ पनि १०० रुपैयाँभन्दा तल झरेर ८४.६८ रुपैयाँमा सीमित भएको छ । अर्थात्, १०० रुपैयाँ अंकित मूल्यमा आईपीओ खरिद गरेका लगानीकर्ताको सेयरको बुक भ्यालु नै प्रतिकित्ता करिब १६ रुपैयाँले घटेको अवस्था बनेको छ ।

अघिल्लो आर्थिक वर्षको यही अवधिमा कम्पनीको प्रतिसेयर नेटवर्थ ९२.२९ रुपैयाँ रहेको थियो । तर पछिल्लो विवरणले कम्पनीको पूँजीगत आधार थप कमजोर बन्दै गएको संकेत गरेको छ ।

ऊर्जा क्षेत्रका केही कम्पनीहरूले आईपीओपछि आक्रामक वित्तीय प्रक्षेपण देखाए पनि वास्तविक सञ्चालनमा अपेक्षित प्रतिफल दिन नसकिरहेको सन्दर्भमा बुंगल हाइड्रोको पछिल्लो अवस्था लगानीकर्ताका लागि अर्को चेतावनी संकेतका रूपमा हेरिएको छ ।