जेनजी आन्दोलनपछि बन्द भएको तारागाउँ रिजेन्सीले बेहोर्यो रु.१४.४८ घाटा, आम्दानीमा भारि गिरावट

काठमाण्डौ । जेनजी आन्दोलनका क्रममा तोडफोड र आगजनीपछि बन्द भएको तारागाउँ रिजेन्सी होटल्स लिमिटेडले साढे १४ करोड रुपैयाँ घाटा ब्यहोरेको छ । चालु आवको तेस्रो त्रैमाससम्म कम्पनी १४ करोड ४८ लाख ३१ हजार रुपैयाँ घाटामा देखिएको हो ।  

गत आवको सोही अवधिसम्म भने कम्पनीले ३३ करोड ७५ लाख ५६ हजार रुपैयाँ नाफा कमाएको थियो ।  

कम्पनीको सञ्चालन आम्दानी र अन्य आम्दानीमा भारि गिरावट आउँदा घाटा ब्यहोर्न पुगेको हो । तेस्रो त्रैमाससम्म कम्पनीको संचालन आम्दानी १७ करोड १९ लाख रुपैयाँमा सीमित छ, यो आम्दानी गत आवको तुलनामा ८४.१२ प्रतिशत कम हो । गत आवको सोही अवधिसम्म कम्पनीको यस्तो आम्दानी १ अर्ब ८ करोड २९ लाख रुपैयाँ रहेको थियो ।  

साथै कम्पनीको अन्य आम्दानी समेत खुम्चिएको छ । गत आवको तेस्रो त्रैमाससम्म १२ करोड ७८ लाख रुपैयाँ अन्य आम्दानी गरेको यस कम्पनीले चालु आवको तेस्रो त्रैमाससम्म जम्मा ६ करोड ३२ लाख रुपैयाँ मात्रै आम्दानी गरेको छ ।  

गत आवको तेस्रो त्रैमाससम्म १७.२० रुपैयाँ इपीएस रहेकोमा चालु आवको यस अवधिसम्म आइपुग्दा ७.३८ रुपैयाँ ऋणात्मक हुन पुगेको छ । साथै प्रतिसेयर नेटवर्थ १४७.३० रुपैयाँ, पीई रेसियो १०४.४७ गुणा ऋणात्मक र तरलता अनुपात १.३३ प्रतिशत रहेको छ ।