बाढीपहिरोको जोखिमपछि बीपी राजमार्गमा रात्रिकालीन यातायातमा रोक, सडक मर्मतका लागि जेठ २ सम्म हिल्सा–सिमकोट सडक बन्द

काठमाण्डौं । सम्भावित बाढी, पहिरो तथा सडक निर्माण कार्यका कारण काभ्रेपलाञ्चोक–सिन्धुली जोड्ने बीपी राजमार्ग र हुम्लाको हिल्सा–सिमकोट सडक खण्डमा सवारी आवागमन अस्थायी रूपमा बन्द गरिएको छ ।  

प्रहरी प्रधान कार्यालयले यात्रुको सुरक्षालाई ध्यानमा राख्दै दुवै सडकखण्डमा निश्चित समयका लागि यातायात सञ्चालन रोकिएको जनाएको हो ।

प्रहरी प्रधान कार्यालयद्वारा बुधबार जारी सूचनाअनुसार काभ्रेपलाञ्चोकको खुर्कोट–नेपालथोक–कटुन्जेबेँसी हुँदै सिन्धुली जोड्ने बीपी राजमार्गमा रातिको समयमा सवारी सञ्चालनमा रोक लगाइएको छ ।  

मौसममा आएको परिवर्तनसँगै बाढी र पहिरोको जोखिम बढेपछि वैशाख २१ गतेदेखि अर्को आदेश नभएसम्म हरेक दिन साँझ ५ बजेदेखि बिहान ५ बजेसम्म उक्त सडकखण्डमा सवारी सञ्चालन बन्द गरिएको हो ।

प्रहरीका अनुसार वर्षायाम नजिकिएसँगै नदी तथा खोलामा पानीको बहाव बढ्ने, सडक माथिबाट पहिरो झर्ने तथा सडक अवरुद्ध हुने सम्भावना उच्च भएकाले सावधानीस्वरूप यस्तो निर्णय गरिएको हो । 

विशेषगरी रातिको समयमा दृश्यता कम हुने र उद्धार तथा व्यवस्थापनमा कठिनाइ हुने भएकाले यात्रुको सुरक्षालाई प्राथमिकतामा राख्दै रात्रिकालीन यातायात बन्द गरिएको जनाइएको छ ।

यसैगरी, हुम्लाको नाम्खा गाउँपालिका–२ अन्तर्गत च्यादुक क्षेत्रमा सडक विस्तारको काम भइरहेका कारण हिल्सा–सिमकोट सडक खण्डमा पनि सवारी सञ्चालन रोकिएको छ ।  

प्रहरीका अनुसार च्यादुक होटलदेखि च्याछरासम्म सडक खन्ने तथा विस्तार गर्ने कार्य जारी रहेकाले माथिबाट ढुङ्गा, माटो र पहिरो खस्ने जोखिम बढेको छ ।

सो जोखिमलाई मध्यनजर गर्दै वैशाख २९ गतेदेखि जेठ २ गतेसम्म उक्त सडकखण्डमा सम्पूर्ण सवारी आवागमन बन्द गरिएको प्रहरीले जनाएको छ ।  

सडक निर्माणका क्रममा दुर्घटनाको सम्भावना बढ्न सक्ने भएकाले केही दिनका लागि यातायात पूर्ण रूपमा रोकिएको हो ।

प्रहरीले यात्रु तथा सवारी चालकलाई यात्रा अघि सडकको अवस्थाबारे जानकारी लिन, वैकल्पिक मार्ग प्रयोग गर्न तथा मौसम प्रतिकूल भएका बेला अनावश्यक यात्रा नगर्न आग्रह गरेको छ ।  

साथै, सडक अवरोधका कारण यात्रामा समस्या हुन सक्ने भएकाले आवश्यक सतर्कता अपनाउन पनि अनुरोध गरिएको छ ।