बीपी राजमार्गको चारसयबेँसी खण्ड १० दिनभित्र सञ्चालनमा ल्याइने

काठमाण्डौं । बीपी राजमार्गको पुनर्निर्माणअन्तर्गत सबैभन्दा जटिल मानिएको चारसयबेँसी खण्डको नयाँ सडक ट्रयाक आगामी १० दिनभित्र सञ्चालनमा ल्याउने तयारी गरिएको छ ।  

निर्माणाधीन खण्डमा तीव्र गतिमा काम भइरहेको र निर्धारित समयसीमाभित्र मुख्य मार्ग खुलाउने लक्ष्यका साथ काम अगाडि बढाइएको सरोकारवालाले बताएका छन् ।

संघीय संसद्को पूर्वाधार विकास समितिका सभापति आशिष गजुरेलले स्थलगत निरीक्षणपछि आयोजनाको प्रगति सन्तोषजनक रहेको जानकारी दिएका छन् ।  

उनका अनुसार माथिल्लो मुख्य ट्रयाकको अधिकांश संरचनात्मक काम सम्पन्न भइसकेको छ र अब अन्तिम चरणका निर्माण गतिविधि जारी छन् ।

हाल यातायात सेवा वैकल्पिक तल्लो मार्गमार्फत सञ्चालन भइरहेको छ ।

निर्माण कार्यलाई प्रभावित हुन नदिन मुख्य ट्रयाक सर्वसाधारणका लागि तत्काल खुला नगरिएको भएपनि आवश्यक परे आपत्कालीन अवस्थामा प्रयोग गर्न सकिने अवस्थामा रहेको प्राविधिक टोलीले जनाएको छ ।

निरीक्षणका क्रममा प्राविधिकहरूले ट्रयाकको आधार निर्माण सम्पन्न भएको र केही स्थानमा मात्र सुरक्षात्मक पर्खाल तथा थप संरचनागत काम बाँकी रहेको जानकारी दिएका छन् ।  

पछिल्ला १५ दिनभित्र कठिन भू–भागमा नयाँ मार्ग तयार पार्ने काम उल्लेखनीय रूपमा अघि बढेको बताइएको छ ।

अब बाँकी रहेको फिलिङ, ढलान, पर्खाल तथा सुरक्षात्मक संरचना निर्माणको काम सम्पन्न गरी छोटो समयमै मुख्य मार्ग सञ्चालनमा ल्याउने योजना रहेको छ ।  

 

आयोजना पक्षका अनुसार मौसमले साथ दिए निर्धारित समयभित्र सवारीसाधनलाई माथिल्लो ट्रयाकबाटै सञ्चालन गर्ने वातावरण तयार हुनेछ ।

करिब १० किलोमिटर क्षेत्रफलमा फैलिएको यस परियोजनामा दैनिक करिब १०० जना कामदार खटिएका छन् ।

स्थानीय तह, यात्रु तथा सरोकारवालाले कामको गति बढाउन तीन सिफ्ट प्रणाली लागू गर्न सुझाव दिएपनि कामदारको स्वास्थ्य अवस्था, सुरक्षा र कार्यक्षमता कायम राख्न हाल दैनिक १० घण्टाको कार्यतालिका अपनाइएको बताइएको छ ।

परियोजनाको भकुण्डेबेँसी क्षेत्रका अधिकांश जटिल निर्माण कार्य सम्पन्न भइसकेकाले अहिले ४२० मिटर लामो चारसयबेँसी भागलाई अन्तिम चुनौतीपूर्ण बिन्दुका रूपमा हेरिएको छ ।

सडकको दीर्घकालीन सुरक्षा सुनिश्चित गर्न माटोयुक्त स्थानमा रिटेनिङ वाल तथा चट्टानी क्षेत्रमा सुरक्षात्मक प्रोटेक्सन संरचना निर्माणको कामसमेत समानान्तर रूपमा भइरहेको छ ।

आयोजना व्यवस्थापन पक्षले आगामी असार १५ गतेसम्म उक्त खण्डलाई पूर्णरूपमा सुरक्षित, व्यवस्थित र नियमित सञ्चालनयोग्य बनाउने लक्ष्य लिएको जनाएको छ ।  

निर्माण सम्पन्न भएपछि बीपी राजमार्गको यातायात आवागमन थप सहज र सुरक्षित बन्ने अपेक्षा गरिएको छ ।