कमजोर डलर र कच्चा तेलको मूल्य घट्दा सुनको मूल्य बढ्यो, प्रतिऔंस कति पुग्यो ?

काठमाण्डौ । सोमबार अन्तर्राष्ट्रिय बजारमा सुनको मूल्य वृद्धि भएको छ। अमेरिकी डलर कमजोर हुनु र कच्चा तेलको मूल्य घट्नुका कारण लगानीकर्ताहरू सुरक्षित सम्पत्तितर्फ आकर्षित भएपछि सुनमा वृद्धि देखिएको हो।

सुनको मूल्य ०.७९ प्रतिशत अर्थात ३६.३२ डलर बढेको छ । यससँगै आज सुनको कारोबार प्रतिऔंस ४ हजार ५६१ डलरमा भईरहेको छ । डलर कमजोर हुँदा अन्य मुद्रामा कारोबार गर्ने लगानीकर्ताका लागि सुन सस्तो हुने भएकाले माग बढेको विश्लेषकहरूको भनाइ छ। साथै, कच्चा तेलको मूल्य घट्दा मुद्रास्फीतिको दबाब कम हुने अपेक्षाले पनि सुनलाई समर्थन गरेको छ।

अमेरिका–इरान शान्ति वार्तामा सम्भावित प्रगतिका कारण बजारमा आशावाद देखिएको छ, जसले तेलको आपूर्ति मार्ग स्ट्रेट अफ हर्मुज पुनः खुल्ने सम्भावना बढाएको छ। यसले तेलको मूल्य घटाएको छ र त्यसको प्रभाव समग्र बजारमा देखिएको छ।

यद्यपि अमेरिकी राष्ट्रपति डोनाल्ड ट्रम्पले इरानसँगको सम्झौता तत्काल नहुने संकेत दिएका छन्। यसले बजारमा अनिश्चितता कायम राखेको छ। तेलको मूल्यमा आएको गिरावटले मुद्रास्फीति घटाउने अपेक्षा भए पनि उच्च ब्याजदरको सम्भावनाले सुनको वृद्धि सीमित गर्न सक्ने विश्लेषकहरू बताउँछन्।

आज चाँदीको मूल्य पनि बढेको छ । चाँदीको मूल्य आज २.३४ प्रतिशत अर्थात १.८६ डलरले बढेर प्रतिऔंस ७७.७ डलर कायम भएको छ ।