२४ घण्टामा २ हजारभन्दा बढी चालक कारबाहीमा, २२ लाख राजस्व संकलन

काठमाण्डौं । काठमाडौँ उपत्यका ट्राफिक प्रहरी कार्यालय ले उपत्यकामा ट्राफिक नियम उल्लङ्घन गर्ने चालकविरुद्ध निगरानी कडा बनाएको छ ।

पछिल्लो २४ घण्टामा मात्रै २ हजार ५५ सवारी चालक कारबाहीमा परेका छन् भने त्यसबाट राज्यकोषमा २२ लाख ११ हजार ५ सय २ रुपैयाँ राजस्व संकलन भएको प्रहरीले जनाएको छ ।

ट्राफिक प्रहरीका अनुसार मादक पदार्थ सेवन गरेर सवारी चलाउने ८३ जना चालक पक्राउ परेका छन् ।  

त्यस्तै नियमविपरीत ‘राइड सेयरिङ’ गर्ने १ सय ९२ जना, ट्राफिक संकेत बत्ती उल्लङ्घन गर्ने १ सय ९ जना तथा अत्यधिक गतिमा सवारी चलाउने १ सय २ जना चालक कारबाहीमा परेका छन् ।

लेन अनुशासन उल्लङ्घन गर्ने १ सय ४६ जना, निषेधित क्षेत्रमा हर्न बजाउने १ सय ३ जना, सडक पेटीमा सवारी पार्किङ गर्ने १ सय १२ जना र एकतर्फी सडकमा सवारी चलाउने ८५ जनामाथि पनि कारबाही गरिएको छ ।

यसका अतिरिक्त अन्य विभिन्न ट्राफिक नियम उल्लङ्घन गर्ने १ हजार १ सय २३ जना चालकलाई समेत कारबाही गरिएको ट्राफिक प्रहरीले जनाएको छ ।

प्रहरीका अनुसार पछिल्लो समय उपत्यकामा दुर्घटना न्यूनीकरण, सडक अनुशासन कायम तथा ट्राफिक व्यवस्थापन प्रभावकारी बनाउन चेकिङ र निगरानी बढाइएको छ ।  

ट्राफिक प्रहरीले चालकहरूलाई नियम पालना गरेर सुरक्षित यात्रा गर्न आग्रह गरेको छ ।