काठमाडौँ महानगरको छात्रवृत्ति परीक्षामा २६ हजार ६८० विद्यार्थी सहभागी हुने, २६ हजार ८८८ आवेदनमध्ये २०८ अस्वीकृत

काठमाण्डौं । काठमाडौँ महानगरपालिकाले कक्षा ११ र १२ का लागि सञ्चालन गर्न लागेको छात्रवृत्ति छनोट परीक्षा यस वर्ष पनि ठूलो संख्यामा विद्यार्थीको आकर्षणको केन्द्र बनेको छ ।  

आगामी आइतबार हुने परीक्षामा २६ हजार ६८० जना विद्यार्थी सहभागी हुने भएका छन् ।

महानगरका अनुसार छात्रवृत्तिका लागि यस वर्ष कुल २६ हजार ८८८ जनाले आवेदन दिएका थिए ।  

तीमध्ये आवश्यक कागजात तथा मापदण्ड पूरा नगरेका २०८ जनाको आवेदन अस्वीकृत गरिएको शिक्षा विभागले जनाएको छ ।  

योग्य ठहरिएका सबै विद्यार्थीहरू परीक्षा प्रक्रियामा सहभागी हुनेछन् ।

परीक्षा व्यवस्थापनका लागि महानगरले डिजिटल प्रणालीलाई प्राथमिकता दिँदै प्रवेशपत्र अनलाइनमार्फत उपलब्ध गराएको छ ।  

शिक्षा अधिकृत तथा परीक्षा समितिका सदस्य सचिव रामचन्द्र खड्काका अनुसार विद्यार्थीहरूले आवेदन दिएको प्रणालीमै लगइन गरेर प्रवेशपत्र डाउनलोड गर्न सक्ने व्यवस्था मिलाइएको छ ।  

प्रवेशपत्र अनिवार्य रूपमा रंगीन प्रिन्ट गरिएको हुनुपर्ने नियम लागू गरिएको छ ।

प्रवेशपत्र डाउनलोड गर्न महानगरको आधिकारिक पोर्टल intrance.kathmandu.gov.np  प्रयोग गर्नुपर्नेछ ।  

प्रणालीमा एसईईको सिम्बोल नम्बरलाई युजरनेमका रूपमा राखी जन्ममिति र पासवर्ड प्रयोग गरेर प्रवेशपत्र प्राप्त गर्न सकिने व्यवस्था गरिएको छ ।

परीक्षामा सहभागी विद्यार्थीहरूले प्रवेशपत्रसँगै फोटोसहितको आधिकारिक परिचयपत्र अनिवार्य रूपमा साथमा ल्याउनुपर्नेछ ।  

एसईई प्रवेशपत्र, विद्यालयको परिचयपत्र वा नागरिकताको प्रमाणपत्रमध्ये कुनै एक मान्य कागजात आवश्यक हुने महानगरले स्पष्ट पारेको छ ।

परीक्षा निष्पक्ष र व्यवस्थित बनाउन केन्द्राध्यक्षहरूको अभिमुखीकरण सम्पन्न भइसकेको छ ।

शिक्षा बिभाग प्रमुख नमराज ढकालका अनुसार विद्यार्थीहरूलाई तनावमुक्त वातावरणमा परीक्षा दिन सक्ने गरी आवश्यक निर्देशन दिइएको छ ।

काठमाडौँ महानगरपालिकाले २०८० सालदेखि संस्थागत विद्यालयहरूमा कक्षा ११ र १२ का लागि छात्रवृत्ति वितरण गर्न छनोट परीक्षा प्रणाली लागू गर्दै आएको हो ।

कक्षा १० सम्मको छात्रवृत्तिका लागि वडास्तरीय सिफारिस प्रणाली प्रयोग गरिन्छ भने ११ र १२ का लागि प्रतिस्पर्धात्मक परीक्षा प्रणाली अपनाइएको छ ।

परीक्षापछि योग्यताक्रम सूची सार्वजनिक गरिनेछ र सोही आधारमा म्याचिङ सूचीमार्फत विद्यार्थीलाई छात्रवृत्तिका लागि सिफारिस गरिनेछ ।

सिफारिस भएका विद्यार्थीहरूले सम्बन्धित विद्यालयमा कुनै पनि शुल्क तिर्न नपर्ने व्यवस्था रहेको छ ।

गत वर्ष १४ हजारभन्दा बढी विद्यार्थी सहभागी भएको परीक्षाबाट १० हजार ८६७ जना उत्तीर्ण भएका थिए भने करिब ४५ सय विद्यार्थीले छात्रवृत्ति प्राप्त गरेका थिए ।

यो कार्यक्रम काठमाडौँ महानगरका तात्कालीन प्रमुख बालेन्द्र शाहको कार्यकालमा सुरु गरिएको छात्रवृत्ति व्यवस्थापन प्रणालीका रूपमा विस्तार हुँदै आएको महानगरले जनाएको छ ।