देशभर आज मौसम सामान्य बदली रहने पूर्वानुमान, हिमाली र पहाडी क्षेत्रमा दिनभर बादल लाग्ने सम्भावना

काठमाण्डौं । जल तथा मौसम विज्ञान विभाग, मौसम पूर्वानुमान महाशाखाले सोमबार देशभरको मौसम सामान्यतया बदली रहने जनाएको छ।  

महाशाखाका अनुसार आज दिउँसो हिमाली र पहाडी भू–भागमा साधारणतया बादल लाग्ने तथा तराई क्षेत्रमा आंशिक बदली रहने अनुमान गरिएको छ।

महाशाखाका अनुसार कर्णाली र सुदूरपश्चिम प्रदेशसहित कोशी, बागमती र गण्डकी प्रदेशका हिमाली तथा पहाडी क्षेत्रमा केही स्थानहरूमा मेघगर्जन र चट्याङसहित मध्यम वर्षा वा हिमपात हुन सक्ने सम्भावना छ।  

त्यस्तै, कोशी र लुम्बिनी प्रदेशका तराई भू–भागका एक/दुई स्थानमा पनि मेघगर्जनसहित वर्षा हुने अनुमान गरिएको छ।

महाशाखाले रातिको समयमा भने मौसम केही सुधार हुने जनाएको छ। राति हिमाली भू–भागमा सामान्य बदली रहने, पहाडी भू–भागमा आंशिक बदली रहने र तराई क्षेत्रमा मुख्यतया मौसम सफा रहने सम्भावना छ।

यसैगरी, सुदूरपश्चिम र कर्णाली प्रदेशका हिमाली तथा पहाडी भू–भागका साथै कोशी, बागमती, गण्डकी र लुम्बिनी प्रदेशका हिमाली क्षेत्रका एक/दुई स्थानमा हल्का वर्षा वा हिमपातको सम्भावना पनि रहेको महाशाखाले जनाएको छ।