पेपेको दुई गोलमा आइभरी कोस्टले रच्यो इतिहास, पहिलोपटक विश्वकपको नकआउट चरणमा प्रवेश

काठमाण्डौ । फरवार्ड निकोलास पेपेको उत्कृष्ट दुई गोलको मद्दतमा आइभरी कोस्टले कुरासाओलाई २–० ले पराजित गर्दै पहिलो पटक फिफा विश्वकपको नकआउट चरणमा स्थान सुरक्षित गरेको छ। समूह ‘ई’को अन्तिम खेलमा आएको यो जितसँगै आइभरी कोस्टले विश्वकप इतिहासमा नयाँ अध्याय थपेको हो।

खेलको सातौं मिनेटमै पेपेले गोल गर्दै आइभरी कोस्टलाई अग्रता दिलाएका थिए। दोस्रो हाफको ६४औं मिनेटमा उनले व्यक्तिगत दोस्रो तथा टोलीका लागि दोस्रो गोल गर्दै जित सुनिश्चित गरे। दुवै गोलमा आइभरी कोस्टले आक्रामक खेल प्रस्तुत गरेको थियो।

यो जितसँगै आइभरी कोस्टले समूह चरण ६ अंकसहित समाप्त गर्दै नकआउट यात्रा तय गरेको छ। सन् २००६, २०१० र २०१४ का विश्वकपमा समूह चरणबाटै बाहिरिएको टोलीले यसपटक पहिलो पटक अन्तिम चरणको टिकट काट्न सफल भएको हो। अब आइभरी कोस्टले अन्तिम ३२ मा समूह ‘आई’को उपविजेतासँग प्रतिस्पर्धा गर्नेछ।

विश्वकपमा पहिलो पटक सहभागी बनेको कुरासाओले केही अवसर सिर्जना गरे पनि त्यसलाई गोलमा परिणत गर्न सकेन। हारसँगै प्रतियोगितामा उसको ऐतिहासिक यात्रा समूह चरणमै टुंगिएको छ।

एक समय राष्ट्रिय टोलीबाट बाहिर परेका पेपेले निर्णायक प्रदर्शन गर्दै आफू अझै पनि ठूलो मञ्चका खेलाडी रहेको प्रमाण दिएका छन्। उनको पुनरागमनले आइभरी कोस्टको उपाधि यात्रामा थप आत्मविश्वास थपिएको विश्लेषण गरिएको छ