जापान समूह उपविजेता बन्दै अन्तिम ३२ मा, नकआउटमा ब्राजिलसँग भिड्ने

काठमाण्डौ । गोलरक्षक जायोन सुजुकीको उत्कृष्ट प्रदर्शनको मद्दतमा जापानले फिफा विश्वकप २०२६ को समूह एफ अन्तर्गत स्विडेनसँग १–१ को बराबरी खेलेको छ। खेलको इन्जुरी समयमा सुजुकीले गरेका दुई महत्त्वपूर्ण बचाउले जापानलाई हारबाट जोगाएको हो।

यस नतिजासँगै जापान समूह एफको उपविजेता बन्दै अन्तिम ३२ मा प्रवेश गरेको छ। अब जापानले जुन २९ मा ह्युस्टनमा ब्राजिलसँग प्रतिस्पर्धा गर्नेछ। यता, नेदरल्यान्ड्सले ट्युनिसियालाई ३–१ ले पराजित गर्दै समूह विजेता बनेको छ भने स्विडेन उत्कृष्ट तेस्रो स्थानमा रहने टोलीमध्ये एक बन्दै नकआउट चरणमा पुगेको छ।

पहिलो हाफ दुवै टोलीले सतर्क खेल प्रस्तुत गरेका कारण गोलरहित बराबरीमा सकिएको थियो। दोस्रो हाफको ५६औँ मिनेटमा रित्सु डोआनको उत्कृष्ट थ्रु पासमा दाइजेन माएदाले सानदार गोल गर्दै जापानलाई अग्रता दिलाए।

तर जापानको अग्रता लामो समय टिक्न सकेन। खेलको ६२औँ मिनेटमा एन्थोनी एलाङ्गाले पेनाल्टी क्षेत्रबाहिरबाट शक्तिशाली प्रहार गर्दै स्विडेनका लागि बराबरी गोल फर्काए।

बराबरी गोलपछि स्विडेनले लगातार दबाब सिर्जना गरेको थियो। अलेक्जेन्डर इसाकको खतरनाक प्रहारलाई सुजुकीले उत्कृष्ट बचाउ गरे। इन्जुरी समयको अन्त्यतिर पनि एलाङ्गाको नजिकबाट आएको प्रहार र त्यसलगत्तै इसाकको हेडरलाई सुजुकीले रोक्दै जापानको बराबरी सुरक्षित राखे।

खेलका क्रममा स्विडेनका डिफेन्डर इसाक हिएन ह्यामस्ट्रिङ चोटका कारण पहिलो हाफको अन्त्यतिर मैदान छाड्न बाध्य भए। उनको स्थानमा युवा मिडफिल्डर लुकास बर्गभाल मैदान प्रवेश गरेका थिए।