प्राइम कमर्सियल बैंकको ऋणपत्रमा आजदेखि खरिद आवेदन दिन सकिने, कति पाइन्छ ब्याजदर ?

काठमाण्डौ । प्राइम कमर्सियल बैंक लिमिटेडले आजदेखि कुल ३ अर्ब रुपैयाँबराबरको ऋणपत्र निष्कासन गरेको छ। बैंकले प्रतिकित्ता १ हजार रुपैयाँ अंकित दरका कुल ३० लाख कित्ता भएको ‘प्राइम बैंक डिबेञ्चर २०९३’ जारी गरेको हो ।

निष्कासन गरिएको कुल ऋणपत्रमध्ये १८ लाख कित्ता व्यक्तिगत तवरबाट बिक्री गरिनेछ भने बाँकी १२ लाख कित्ता सर्वसाधारणका लागि सार्वजनिक निष्कासनमार्फत बिक्री गर्न लागिएको हो। सार्वजनिक निष्कासनमध्ये ५ प्रतिशत अर्थात ६० हजार कित्ता सामूहिक लगानी कोषका लागि छुट्याइएको छ।

१० वर्ष अवधिको यो ऋणपत्रको ब्याजरदर ६.२५ प्रतिशत रहनेछ ।

लगानीकर्ताले सि–आस्बा सेवामा सहभागी बैंक तथा वित्तीय संस्था र तिनका शाखा कार्यालयमार्फत आवेदन दिन सक्नेछन्। यो ऋणपत्र निष्कासन छिटोमा असार १९ गते र ढिलोमा असार ३० गते बैंकिङ समयपछि बन्द हुनेछ।

इच्छुक लगानीकर्ताले न्यूनतम २५ कित्ता र अधिकतम २ लाख कित्तासम्म आवेदन दिन सक्ने व्यवस्था गरिएको छ।

उक्त ऋणपत्रको निष्कासन तथा बिक्री प्रबन्धकको रुपमा सानिमा क्यापिटल लिमिटेड रहेको छ। बैंकले नेपाल धितोपत्र बोर्डबाट असार ३ गते ऋणपत्र निष्कासनका लागि अनुमति प्राप्त गरेको थियो ।