विश्वकपमा हालसम्म पनि ब्राजिललाई हराउन नसकेको नर्वेलाई अन्तिम १६ पार गर्ने चुनौती, दुई टोलिबीच कसले मार्लान बाजी ?

काठमाण्डौ । विश्वकप २०२६ को रोमाञ्चक राउन्ड अफ १६ अन्तर्गत पाँच पटकको विश्व च्याम्पियन ब्राजिल र युरोपेली टोली नर्वेबीच निर्णायक भिडन्त आज आइतबार न्यू जर्सीस्थित मेटलाइफ स्टेडियममा हुँदैछ। यो खेल क्वार्टरफाइनल प्रवेशका लागि अत्यन्त महत्वपूर्ण मानिएको छ।

ब्राजिलले अन्तिम ३२ मा जापानलाई २–१ ले हराउँदै कठिन परिस्थितिबाट पुनरागमन गरेको थियो। खेलमा जापानले अग्रता लिए पनि ब्राजिलले दोस्रो हाफमा उत्कृष्ट प्रदर्शन गर्दै जित हासिल गरेको हो।

त्यस्तै, नर्वेले आइभरी कोस्टलाई २–१ ले पराजित गर्दै नाटकीय जितसहित अन्तिम १६ मा स्थान सुरक्षित गरेको थियो। स्टार स्ट्राइकर एर्लिङ हालान्डले अन्तिम समयमा निर्णायक गोल गर्दै टोलीलाई जित दिलाएका थिए।

ब्राजिल र नर्वेबीचको इतिहास रोचक छ। हालसम्म भएका चार भेटमा ब्राजिलले नर्वेलाई कहिल्यै हराउन सकेको छैन। नर्वेले २ जित र २ बराबरीसहित अपराजित रेकर्ड कायम राखेको छ।

विशेषगरी सन् १९९८ विश्वकपमा नर्वेले ब्राजिललाई २–१ ले हराएको ऐतिहासिक घटना अझै चर्चित छ।

ब्राजिलतर्फ भिनिसियस जुनियर, कासेमिरो र गोलकिपर एलिसन प्रमुख हतियार मानिन्छन्। प्रशिक्षक कार्लो एन्सेलोटीले टोलीलाई सन्तुलित आक्रामक शैलीमा उतार्ने तयारी गरेका छन्।

नर्वेतर्फ एर्लिङ हालान्ड मुख्य स्टार हुन्, जसले यस प्रतियोगितामा अहिलेसम्म ५ गोल गरिसकेका छन्। कप्तान मार्टिन ओडेगार्डले मिडफिल्डबाट खेल नियन्त्रण गर्ने जिम्मा लिनेछन्।

यो खेल जित्ने टोलीले क्वार्टरफाइनलमा स्थान बनाउनेछ र विश्वकप उपाधि यात्रामा एक कदम अगाडि बढ्नेछ। ब्राजिल आफ्नो छैटौं विश्वकप उपाधिको खोजीमा छ भने नर्वे पहिलो पटक गहिरो चरणसम्म पुग्ने लक्ष्यमा छ।