गगनको आरोप– सरकार विधि होइन, वाहवाहीको बाटोमा हिँड्यो

काठमाण्डौ । नेपाली कांग्रेसका सभापति गगन थापाले वर्तमान बालेन्द्र शाह नेतृत्वको सरकार विधि र प्रक्रियाभन्दा लोकप्रियता केन्द्रित काममा बढी लागेको आरोप लगाएका छन्।

सरकारका १०० दिनबारे पार्टी केन्द्रीय कार्यालय सानेपामा आइतबार सुरु भएको समीक्षात्मक कार्यक्रममा बोल्दै थापाले सरकारले ‘परिणाम दिन्छु’ भन्ने नाममा कानुन र प्रक्रियालाई बेवास्ता गर्न थालेको टिप्पणी गरे।

“विधि र प्रक्रिया केही होइन, परिणाम दिन्छु भनेर सरकार हिँडिरहेको छ,” थापाले भने, “यस्तो अभ्यास हामीले विगतमा पनि देखेका थियौँ। तत्कालीन नेकपाको सरकारभन्दा अहिलेको सरकार फरक देखिएन।”

थापाले विशेषगरी सुकुम्बासी बस्ती हटाउने विषयलाई उदाहरणका रूपमा अघि सारे। भूमिहीनको समस्या कानुन बनाएर समाधान गर्न सकिने भए पनि सरकारले सामाजिक सञ्जालमा वाहवाही पाउने उद्देश्यले पहिले घर भत्काउने बाटो रोजेको उनको आरोप थियो।

“यो सरकारलाई नागरिकको ‘लाइफ’भन्दा सामाजिक सञ्जालको ‘लाइक’को चिन्ता छ,” थापाले भने, “भूमिहीनको समस्या कानुन बनाएर समाधान गरेको भए सामाजिक सञ्जालमा लाइक आउँदैनथ्यो, त्यसैले सुकुम्बासी बस्तीमा डोजर चलाइयो।”

उनले सरकार लोकप्रियताको पछि लाग्दा नागरिकको वास्तविक समस्या ओझेलमा पर्न थालेको बताए। विधि, प्रक्रिया र कानुनी आधारबिना गरिने कामले क्षणिक चर्चा पाए पनि दीर्घकालीन समाधान दिन नसक्ने उनको भनाइ थियो।

तर, थापाले प्रधानमन्त्री शाहले बालुवाटारभन्दा सिंहदरबारबाट शासन गरेको भन्दै त्यसलाई सकारात्मक पक्षका रूपमा प्रशंसा गरे। शासन सञ्चालनको केन्द्र सिंहदरबार नै बन्नुपर्छ भन्ने मान्यतामा आफू स्पष्ट रहेको उनको भनाइ थियो।

थापाले सरकारको काम गर्ने शैलीमा सुधार आवश्यक रहेको भन्दै कानुन, प्रक्रिया र नागरिक जीवनसँग प्रत्यक्ष जोडिएका मुद्दामा सरकार गम्भीर हुनुपर्ने बताए।