मेक्सिकोसँगको खेलअघि बेलायतका फुटबल खेलाडीले भियग्रा प्रयोग गर्नसक्ने

काठमाण्डौ । जारी फिफा विश्वकप २०२६ अन्तर्गत मेक्सिकोविरुद्धको अन्तिम–१६ खेलअघि इंग्ल्यान्ड टोलीको तयारीले नयाँ चर्चा पाएको छ। विभिन्न अन्तर्राष्ट्रिय सञ्चारमाध्यमका अनुसार इंग्ल्यान्डका खेलाडीहरूलाई उच्च उचाइको असर कम गर्न आवश्यक परे भियग्रा प्रयोग गर्ने विकल्प उपलब्ध गराइएको छ।

यो खेल मेक्सिको सिटीस्थित प्रतिष्ठित एस्टाडियो एज्टेका रंगशालामा हुनेछ, जुन समुद्री सतहबाट करिब २,२४० मिटर (७,३५० फिट) उचाइमा अवस्थित छ। यस्तो उचाइमा हावामा अक्सिजनको मात्रा कम हुने भएकाले खेलाडीहरूको सहनशक्ति, तीव्र गतिमा खेल्ने क्षमता र रिकभरी प्रक्रियामा प्रभाव पर्न सक्छ।

रिपोर्टअनुसार इंग्ल्यान्डको मेडिकल टोलीले उच्च उचाइका कारण हुने शारीरिक असर कम गर्न विभिन्न उपायहरूको अध्ययन गरेको छ। त्यसक्रममा  भियग्रालाई पनि कानुनी विकल्पका रूपमा विचार गरिएको बताइएको छ। सामान्यतया इरेक्टाइल डिस्फङ्सन (यौन दुर्बलता) को उपचारमा प्रयोग हुने यो औषधिले रक्तनलीहरू फराकिलो बनाउँदै रक्तसञ्चार सुधार गर्न मद्दत गर्ने भएकाले कम अक्सिजन भएको वातावरणमा शरीरलाई अनुकूल हुन सहयोग पुग्न सक्ने विश्वास गरिएको छ।

विश्व एन्टी डोपिङ एजेन्सी(वाडा)ले  भियग्रालाई प्रतिबन्धित औषधिको सूचीमा राखेको छैन। त्यसैले खेलाडीहरूले प्रतियोगिताको दौरान वा बाहिर यसको प्रयोग गर्न पाउँछन्।

वाडाले भियग्राको रक्तसञ्चारमा पर्ने प्रभावबारे अध्ययन गरे पनि सामान्य अवस्थामा यसले खेल प्रदर्शनमा उल्लेखनीय अनुचित लाभ दिलाउने पर्याप्त वैज्ञानिक प्रमाण फेला परेको छैन। यसको सम्भावित फाइदा मुख्यतः उच्च उचाइमा खेल्दा देखिन सक्ने भएकाले, यदि इंग्ल्यान्डका खेलाडीहरूले यसको प्रयोग गरे भने त्यसको उद्देश्य केवल मेक्सिको सिटीको उच्च उचाइबाट हुने शारीरिक असर कम गर्नु हुनेछ, खेलमा अनुचित फाइदा लिनु होइन।