कांग्रेसमा विभाग नबन्ने, नीति प्रतिष्ठानबाटै विषयगत काम हुने

 

काठमाण्डौ । नेपाली कांग्रेसले अब विषयगत विभाग गठन नगर्ने भएको छ । केन्द्रदेखि तल्लो तहसम्म विभाग बनाउने विगतको परम्परालाई हटाउँदै कांग्रेसले विभागले गर्ने काम नीति, अनुसन्धान तथा प्रशिक्षण प्रतिष्ठानमार्फत अघि बढाउने निर्णय गरेको हो ।

उपसभापति विश्वप्रकाश शर्माको नेतृत्वमा रहेको नीति, अनुसन्धान तथा प्रशिक्षण प्रतिष्ठानले नै विभागीय प्रकृतिका काम गर्ने कांग्रेस सभापति गगन थापाले जानकारी दिए । उनका अनुसार पार्टीले तय गर्ने विषयगत धारणा, नीति निर्माण, बहस र पैरवी प्रतिष्ठानमार्फत अघि बढाइनेछ ।

गत पुसमा सम्पन्न विशेष महाधिवेशनबाट पारित विधानमा विभागको व्यवस्था हटाइएको थियो । सोही व्यवस्थाअनुसार विभागले गर्ने कामका लागि प्रतिष्ठानअन्तर्गत विभिन्न उपसमिति गठन गरिएको छ । हालसम्म फरक–फरक क्षेत्र हेर्ने गरी १२ वटा उपसमिति गठन भएका छन् ।

नीतिगत तथा समसामयिक विषयमा केन्द्रीय कार्यालयमा पछिल्लो समय निरन्तर अन्तरसंवाद हुँदै आएको छ । नीति प्रतिष्ठानले सञ्चालन गर्दै आएको यस्ता बहसलाई ‘ग्रीन टेबल’ नाम दिइएको छ । नीतिगत विषयमा बहस र समन्वयका लागि कञ्चन झाको नेतृत्वमा उपसमिति गठन गरिएको छ ।

भूमि व्यवस्था, सुकुम्बासी र अव्यवस्थित बसोबासीका दीर्घकालीन समाधानबारे पार्टीको साझा धारणा तयार गर्ने जिम्मेवारी डा. गोपाल दहित नेतृत्वको उपसमितिले पाएको छ । विपद् व्यवस्थापनसम्बन्धी उपसमितिको संयोजकमा मानबहादुर थापा छन् । उक्त उपसमितिले विपद्को पूर्वतयारी, उद्धार तथा पुनर्स्थापनामा सहजीकरण गर्नेछ ।

मानसिक स्वास्थ्य सचेतनाका लागि मोहना अन्सारी, सूचना प्रविधि तथा डिजिटल सुशासनका लागि दिपेश विष्ट र निर्वाचन प्रणाली सुधारसम्बन्धी अवधारणा, संवाद तथा समन्वयका लागि जनक चटौतलाई जिम्मेवारी दिइएको छ ।

पूँजीगत बजेट खर्च प्रणाली सुधार र पूर्वाधार निर्माणको गति बढाउन आवश्यक नीति तथा योजना तर्जुमाका लागि पूर्वाधार विकास अवधारणा, संवाद र दृष्टि उपसमिति बनाइएको छ । उक्त उपसमितिको संयोजन अमृत ज्ञवालीले गर्दै आएका छन् ।

उद्यमशीलता, नवप्रवर्तन र रोजगारसम्बन्धी पार्टीको धारणा निर्माणको संयोजन खगेन्द्र आचार्यले गर्दै आएका छन् । शिक्षा र शिक्षालयबारे पार्टीको अवधारणा निर्माणको जिम्मेवारी डा. कृष्णप्रसाद पौडेललाई दिइएको छ । पौडेल नेतृत्वको उपसमितिले शिक्षा क्षेत्रका सरोकारवालासँग केन्द्रीय कार्यालयमा बहस र अन्तरक्रिया गरिसकेको छ ।

जेनजी आन्दोलनका क्रममा जलेको कांग्रेस केन्द्रीय कार्यालयको पुनर्व्यवस्थापन गरी त्यसलाई बीपी विचार स्कूलका रूपमा विकास गर्ने जिम्मेवारी प्रकाश लामिछानेले पाएका छन् । जातीय विभेदविरुद्ध सचेतना अभियानको संयोजन एलिजा ढकालले गर्नेछिन् । डिजिटल सचेतना तथा तथ्य जाँचका लागि गठित उपसमितिको संयोजक प्रकृति भट्टराई तोकिएकी छन् ।

उपसभापति शर्माको नेतृत्वमा रहेको नीति प्रतिष्ठानको उपप्रमुखमा केन्द्रीय सदस्य मधु आचार्य छन् भने निर्देशकमा डा. सुरेश आचार्य मनोनित भएका छन् । विधानअनुसार प्रतिष्ठानमा प्रमुखसहित ५१ सदस्य रहने व्यवस्था भए पनि हाल ४७ सदस्यीय समिति गठन भएको छ ।