मोरक्कोलाई हराउँदै फ्रान्स विश्वकपको सेमिफाइनलमा

काठमाण्डौ । फिफा विश्वकप २०२६ को क्वार्टरफाइनलमा फ्रान्सले मोरक्कोलाई २–० ले पराजित गर्दै सेमिफाइनलमा स्थान सुरक्षित गरेको छ। फ्रान्सका कप्तान किलियन एमबाप्पेले पहिलो हाफमा पाएको पेनाल्टी गोल गर्न नसके पनि दोस्रो हाफको ६०औँ मिनेटमा आकर्षक कर्लिङ प्रहारमार्फत टोलीलाई अग्रता दिलाए। त्यसअघि उनको पेनाल्टी मोरक्कोका गोलरक्षक यासिन बोनोले सहज रूपमा बचाएका थिए।

एमबाप्पेको गोल गरेको ६ मिनेटपछि उस्मान डेम्बेलेले अर्को गोल थप्दै फ्रान्सको जित सुनिश्चित गरे। बोनोले बल रोक्ने प्रयास गरे पनि गोल हुनबाट जोगाउन सकेनन्।

यससँगै एमबाप्पेले प्रतियोगितामा आफ्नो आठौँ गोल पूरा गर्दै अर्जेन्टिनाका लियोनेल मेसीसँग बराबरी गरेका छन्। यद्यपि, बढी असिस्ट गरेका कारण उनी हाल गोल्डेन बुटको दौडमा शीर्ष स्थानमा छन्। साथै, विश्वकप करियरमा एमबाप्पेको गोल संख्या २० पुगेको छ, जुन मेसीको २१ गोलको कीर्तिमानभन्दा एक गोलले मात्र कम हो।

खेलभर फ्रान्सले दबाब कायम राख्दै मोरक्कोलाई सीमित अवसर मात्र दियो। मोरक्कोले खेलमा जम्मा पाँच प्रहार गर्दा एउटा मात्र प्रहार लक्ष्यमा परेको थियो। लगातार छैटौँ जित निकालेको फ्रान्सले प्रतियोगितामा हालसम्म ६ खेलमा १६ गोल गर्दै उत्कृष्ट लय कायम राखेको छ।

अब फ्रान्सले फाइनल प्रवेशका लागि सेमिफाइनलमा स्पेन वा बेल्जियममध्ये एकसँग प्रतिस्पर्धा गर्नेछ।