विश्वकप सेमिफाइनलअघि ह्यारी केनको चेतावनी, अर्जेन्टिनाविरुद्ध इंग्ल्यान्ड अझ बलियो बन्ने दाबी

काठमाण्डौ । इंग्ल्यान्डको राष्ट्रिय फुटबल टोलीका कप्तान ह्यारी केनले विश्वकप २०२६ को सेमिफाइनलमा अर्जेन्टिनाविरुद्ध मैदान उत्रनुअघि आफ्नो टोलीले प्रदर्शन सुधार गर्ने चेतावनी दिएका छन्। उनले अहिलेसम्म टोलीले आफ्नो उत्कृष्ट खेल देखाउन नसकेको स्वीकार गर्दै निर्णायक खेलमा अझ राम्रो प्रदर्शन गर्ने बताएका छन्।

इंग्ल्यान्डले क्वार्टरफाइनलमा नर्वेलाई अतिरिक्त समयमा २–१ ले पराजित गर्दै अन्तिम चारमा स्थान बनाएको थियो। उक्त खेलमा कठिन परिस्थितिका बाबजुद टोलीले संघर्ष र मानसिक बल देखाएको भन्दै केनले खेलाडीहरूको प्रतिबद्धताको प्रशंसा गरे।

‘हामी अझ राम्रो खेल्न सक्छौं। हामीलाई थाहा छ, सुधार गर्नुपर्ने क्षेत्रहरू छन्,’ केनले भने। उनले टोलीले जितका लागि आवश्यक आत्मविश्वास, इच्छाशक्ति र संघर्ष देखाइसकेको भए पनि अर्जेन्टिनाजस्तो बलियो प्रतिद्वन्द्वीविरुद्ध थप उत्कृष्ट प्रदर्शन आवश्यक रहेको बताए।

इंग्ल्यान्डका प्रशिक्षक थोमस टुचेल पनि नर्वेविरुद्धको प्रदर्शनबाट पूर्ण सन्तुष्ट थिएनन्। उनले टोलीले अझ सुधार गर्नुपर्ने बताउँदै आएका छन्। केनले भने प्रशिक्षकको आलोचना खेलाडीलाई दबाब दिन नभई उत्कृष्ट प्रदर्शन निकाल्ने उद्देश्यले भएको बताएका छन्।

उता अर्जेन्टिनाका कप्तान लियोनल मेस्सीले इंग्ल्यान्डविरुद्धको सेमिफाइनललाई विशेष खेलका रूपमा लिएका छन्। विश्व फुटबलका दुई ठूला शक्तिबीचको यो भिडन्तमा मेस्सी र केन पहिलोपटक विश्वकपको निर्णायक चरणमा आमनेसामने हुँदैछन्।

इंग्ल्यान्ड ६० वर्षपछि पहिलोपटक विश्वकप फाइनल पुग्ने लक्ष्यमा छ भने साविक विजेता अर्जेन्टिना उपाधि रक्षा गर्ने अभियानमा अघि बढिरहेको छ।

सेमिफाइनल भिडन्तले मेस्सीको अनुभव र इंग्ल्यान्डको नयाँ पुस्ताको शक्तिबीचको रोमाञ्चक प्रतिस्पर्धा प्रस्तुत गर्ने अपेक्षा गरिएको छ।