सेमिफाइनल खेलअघि इङ्ग्ल्यान्डका जुड बेलिङ्घमभन्दा पछि परे मेस्सी, वरियतामा तेस्रो स्थानमा झरे

काठमाण्डौ । इङ्ग्ल्यान्डका मिडफिल्डर जुड बेलिङ्घमले फिफा विश्वकप २०२६ को क्वार्टरफाइनलमा नर्वेविरुद्ध दुई गोल गर्दै टोलीलाई सेमिफाइनलमा पुर्याएपछि पछिल्लो फिफा वरियतामा उल्लेखनीय परिवर्तन आएको छ। बेलिङ्घमको प्रभावशाली प्रदर्शनसँगै अर्जेन्टिनाका कप्तान लियोनेल मेस्सी दोस्रोबाट तेस्रो स्थानमा झरेका छन्।

२३ वर्षीय बेलिङ्घमले नर्वेविरुद्ध इङ्ग्ल्यान्डको २–१ को कठिन जितमा दुवै गोल गर्दै जितका नायक बने। यससँगै इङ्ग्ल्यान्डले विश्वकपको सेमिफाइनलमा स्थान सुरक्षित गरेको हो। अर्कोतर्फ, अर्जेन्टिनाले स्विट्जरल्यान्डलाई ३–१ ले पराजित गर्दै अन्तिम चारमा स्थान बनाए पनि कप्तान मेस्सीले गोल गर्न सकेनन्।

क्वार्टरफाइनलपछिको अद्यावधिक फिफा पावर र्याङ्किङमा मेस्सीको आक्रमण स्कोर ८.०७ रहेको छ। बेलिङ्घम भने चार स्थान सुधार गर्दै दोस्रो स्थानमा उक्लिएका छन्। नर्वेविरुद्धको उत्कृष्ट प्रदर्शनपछि उनको आक्रमण स्कोर ८.२५ पुगेको छ।

फ्रान्सका कप्तान किलियन एमबाप्पे भने ८.९७ आक्रमण स्कोरसहित शीर्ष स्थानमा कायम छन्। मोरक्कोविरुद्धको क्वार्टरफाइनल जितमा उनले फेरि एक गोल गर्दै आफ्नो अग्रता अझ बलियो बनाएका हुन्।

नर्वेका स्टार फरवार्ड एर्लिङ हालान्ड गोल गर्न असफल भएपछि उनको वरीयता एक स्थानले घटेको छ। उनी ७.५३ आक्रमण स्कोरसहित चौथो स्थानमा रहेका छन्। यस्तै, फ्रान्सका विङ्गर उस्मान डेम्बेलेले उत्कृष्ट प्रदर्शन गर्दै तीन स्थान सुधार गरी पाँचौं स्थान कब्जा गरेका छन्।

इङ्ग्ल्यान्डका कप्तान ह्यारी केनले टोलीलाई सेमिफाइनलमा पुर्‍याउन योगदान दिए पनि नर्वेविरुद्ध गोल गर्न सकेनन्। त्यसको प्रभावस्वरूप उनी तीन स्थान तल झर्दै ६.९१ आक्रमण स्कोरसहित नवौं स्थानमा पुगेका छन्।

अब विश्वकप २०२६ को सेमिफाइनलमा फ्रान्सले स्पेनसँग प्रतिस्पर्धा गर्नेछ भने अर्को रोमाञ्चक भिडन्तमा अर्जेन्टिनाले इङ्ग्ल्यान्डको सामना गर्नेछ। प्रतियोगिताको फाइनल जुलाई २० मा हुने तालिका रहेको छ।