विश्वकपमा चम्किएका मोरोक्कोका स्टार बुआद्दी भित्र्याउन म्यानचेस्टर सिटीको जोडदार प्रयास, १०० मिलियन युरो माग

काठमाण्डौ । इङ्लिस प्रिमियर लिग क्लब म्यानचेस्टर सिटीले फ्रान्सेली क्लब लिलका प्रतिभाशाली मिडफिल्डर आयुब बुआद्दीलाई अनुबन्ध गर्न तीव्र प्रयास गरिरहेको बताइएको छ। मोरक्कोका १८ वर्षीय मिडफिल्डरले विश्वकपमा उत्कृष्ट प्रदर्शन गरेपछि युरोपका शीर्ष क्लबहरूको ध्यान उनीतर्फ आकर्षित भएको हो।

द एथलेटिकका पत्रकार डेभिड अर्नस्टिनका अनुसार म्यानचेस्टर सिटी बुआद्दीलाई अनुबन्ध गर्ने दौडमा सबैभन्दा अगाडि रहेको छ। लिलले भने खेलाडीको भविष्यबारे निर्णय गर्नुअघि उनी बिदाबाट फर्किएपछि उनका प्रतिनिधिसँग छलफल गर्ने तयारी गरेको छ।

रिपोर्टअनुसार लिलले बुआद्दीको मूल्य करिब १०० मिलियन युरो (झन्डै ८५ मिलियन पाउन्ड) तोकेको छ। यति ठूलो रकमका कारण धेरै इच्छुक क्लबहरू पछि हट्न सक्ने अनुमान गरिएको छ। 

अन्य केही क्लबले उनलाई अनुबन्ध गरेर पुनः लिलमै ऋणमा राख्ने योजना बनाइरहेका भए पनि सिटीले भने उनलाई सिधै पहिलो टोलीमा समावेश गर्न चाहेको बताइएको छ।

मिडफिल्डमा दीर्घकालीन विकल्प खोजिरहेको म्यानचेस्टर सिटीले बुआद्दीलाई भविष्यका लागि महत्त्वपूर्ण लगानीका रूपमा हेरेको छ। विशेषगरी टोलीको मिडफिल्डमा सम्भावित परिवर्तनलाई ध्यानमा राख्दै क्लबले युवा प्रतिभामाथि लगानी बढाइरहेको छ।

यद्यपि आर्सनल र म्यानचेस्टर युनाइटेडले पनि पछिल्लो एक वर्षदेखि बुआद्दीको अवस्थामाथि निगरानी राख्दै आएका छन्। अब भने आफ्नो करियरको अर्को गन्तव्यबारे अन्तिम निर्णय गर्ने जिम्मा स्वयं बुआद्दीको हातमा रहनेछ।