सीपयुक्त जनशक्ति उत्पादनमा फुटवेयर क्षेत्रलाई सरकारको साथ

काठमाण्डौ । प्रधानमन्त्री बालेन्द्र शाहले साउन १ गते फुटवेयर म्यानुफ्याक्चर्स एसोसिएसन नेपाल (एफएमएएन)का पदाधिकारीहरूसँग गरेको भेटघाट पश्चात् दिएको निर्देशनअनुरूप, माननीय युवा, श्रम तथा रोजगार मन्त्री रामजी यादवले नेपाली युवाहरूका लागि सीप विकास तथा रोजगारीका अवसर सिर्जना गर्ने सम्बन्धमा एसोसिएसनका प्रतिनिधिहरूसँग आज भेटघाट गरेका छन् ।  

भेटघाटमा फुटवेयर उद्योगमा आवश्यक पर्ने सीपयुक्त जनशक्ति निर्माण गरी विगतका सीप, तालिम तथा रोजगार कार्यक्रमहरूबाट गर्नुपर्ने सिकाइका विषयमा छलफल गरे । छलफलमा फुटवेयर उद्योगमा भविष्यमा सहकार्य गर्न सकिने क्षेत्रहरूका विषयमा समेत छलफल भएको छ ।

सोही क्रममा माननीय मन्त्री यादवले ‘आन्तरिक रोजगारी प्रवद्र्धन दशक’ अभियानलाई सफल बनाउन सरकार र फुटवेयर उद्योगलगायतका निजी क्षेत्र बिचको सहकार्यलाई अझ प्रभावकारी, परिणाममुखी र दिगो बनाउने विषयमा मन्त्रालय प्रतिबद्ध रहेको बताए ।  

भेटघाटमा फुटवेयर उद्योगका प्रतिनिधीहरुले १८ देखि २० हजार जनालाई रोजगार दिने प्रतिबद्धता व्यक्त गरेका छन् । देशमा आन्तरिक रोजगारी सिर्जना गरी युवाहरूलाई देशमै अवसर सिर्जना गर्न निजी क्षेत्रको महत्त्वपूर्ण भूमिकाबारे छलफल गरिएको छ । 

छलफलमा सरकारले सिपयुक्त जनशक्ति निर्माण गर्ने र निजी क्षेत्रले रोजगारी दिने कुरामा निरन्तर सहकार्य रहनेबारे समेत छलफल गरिएको छ ।  

रोजगारी सिर्जना गर्न मर्यादित श्रमको उपयुक्त वातावरण निर्माण गर्न श्रम र रोजगार प्रणाली स्थापना गर्न यो संवाद र सहकार्यले विशेष महत्त्व राख्ने विश्वास राखिएको छ ।