२० हजार टिकट निःशुल्क बाड्दै इन्डिगो

काठमाण्डौ । भारतको सबैभन्दा ठूलो एयरलाइन्स कम्पनी इन्डिगोले आफ्नो २०औं वार्षिकोत्सवको अवसरमा यात्रुका लागि विशेष अफर सार्वजनिक गरेको छ। कम्पनीले ‘ह्याप्पी इन्डिगो डे’ अभियानअन्तर्गत २० हजार निःशुल्क घरेलु हवाई टिकट जित्ने अवसर प्रदान गर्ने घोषणा गरेको छ।

यस अफरअन्तर्गत छनोट भएका यात्रुको टिकट भाडा रकम फिर्ता गरिनेछ। रिफन्ड रकम प्रतिव्यक्ति अधिकतम १० हजार भारतीय रुपैयाँसम्म हुनेछ। यो योजना ४ अगस्टदेखि ६ अगस्ट २०२६ सम्म गरिएका योग्य घरेलु उडान बुकिङमा लागू हुनेछ।

इन्डिगोका अनुसार यो अफर कम्पनीका आधिकारिक माध्यमबाट गरिएका बुकिङमा मात्र उपलब्ध हुनेछ। यात्रुले इन्डिगोको वेबसाइट, मोबाइल एप वा एआई भर्चुअल असिस्टेन्ट सिक्सकाई मार्फत टिकट बुक गरेको हुनुपर्नेछ।

अफर अवधिमा योग्य घरेलु उडान बुक गर्ने यात्रुलाई र्यान्डम छनोट प्रक्रियामा समावेश गरिनेछ। छनोट भएका यात्रुलाई इमेल र ह्वाट्सएपमार्फत सूचना पठाइनेछ, जहाँ उनीहरूलाई एउटा सामान्य प्रश्नको उत्तर दिन भनिनेछ।

सही उत्तर दिने यात्रुले आफ्नो टिकट भाडा फिर्ता पाउनेछन्। प्रत्येक छनोट भएका यात्रुलाई सही उत्तर दिन तीनवटा अवसर प्रदान गरिनेछ। सफल यात्रुको रिफन्ड रकम तीनदेखि पाँच कार्यदिवसभित्र उपलब्ध गराइने कम्पनीले जनाएको छ।

यो अफर इकोनोमी क्लास र इन्डिगोको प्रिमियम सेवा इन्डिगो स्ट्रेच दुवैका लागि लागू हुनेछ। यसमा घरेलु रुटका एकतर्फी तथा दुईतर्फी  यात्राका टिकट समावेश छन्।

इन्डिगोले ४ अगस्ट २००६ मा गुवाहाटी हुँदै दिल्ली–इम्फाल रुटमा पहिलो उडान सञ्चालन गर्दै आफ्नो यात्रा सुरु गरेको थियो। दुई दशकपछि कम्पनीसँग अहिले ४३० भन्दा बढी विमानको बेडा रहेको छ र दैनिक करिब २,२०० उडान सञ्चालन गर्दै आएको छ।