सुदूरपश्चिम प्रदेशका मुख्यमन्त्री शाहले आज विश्वासको मत लिने

काठमाण्डौ । सुदूरपश्चिम प्रदेशका मुख्यमन्त्री कमलबहादुर शाहले आज प्रदेशसभाबाट विश्वासको मत लिँदै छन्। विश्वासको मत प्रयोजनका लागि प्रदेशसभा बैठक अपराह्न ५ बजे बोलाइएको छ।

प्रदेशसभा सचिवालयका अनुसार सत्ता गठबन्धनमा रहेको नेकपा एमालेले गत असार ३१ गते सरकारलाई दिएको समर्थन फिर्ता लिएपछि मुख्यमन्त्री शाह विश्वासको मत लिन बाध्य भएका हुन्। संवैधानिक व्यवस्थाअनुसार समर्थन फिर्ता भएको ३० दिनभित्र मुख्यमन्त्रीले विश्वासको मत लिनुपर्ने वा पदबाट राजीनामा दिनुपर्ने हुन्छ।

मुख्यमन्त्री शाहले बुधबार सभामुख भीमबहादुर भण्डारीलाई विश्वासको मत लिने जानकारी गराउँदै प्रदेशसभा बैठक आह्वानका लागि पत्र पठाएका थिए।

५३ सदस्यीय सुदूरपश्चिम प्रदेशसभामा सरकार टिकाउन कम्तीमा २७ मत आवश्यक पर्छ। प्रदेशसभामा नेपाली कांग्रेसका १८, नेपाली कम्युनिष्ट पार्टीका सभामुखसहित २२, एमालेका ११ र राष्ट्रिय प्रजातन्त्र पार्टीका एक सांसद छन्।

प्रदेशसभा सचिवालयका अनुसार हाल एक सांसद देशबाहिर छन् भने एक जना निलम्बनमा छन्। आजको बैठकमा लामो समयदेखि अनुपस्थित केही प्रदेशसभा सदस्यका विषयमा पनि छलफल हुने बताइएको छ।