लामो विदेश बसाइपछि काठमाडौं उत्रिए देउवा

काठमाण्डौ । नेपाली कांग्रेसका पूर्वसभापति तथा पूर्वप्रधानमन्त्री शेरबहादुर देउवा साढे पाँच महिनापछि स्वदेश फर्किएका छन्। उनी बिहीबार त्रिभुवन अन्तर्राष्ट्रिय विमानस्थलमा अवतरण गरेका हुन्।

देउवाको स्वागतका लागि कांग्रेसका नेता, कार्यकर्ता तथा शुभचिन्तकहरू विमानस्थल परिसरमा ठूलो संख्यामा पुगेका थिए। पार्टीका केही शीर्ष नेताहरूसमेत उनको स्वागतमा उपस्थित भए पनि विशेष महाधिवेशनबाट निर्वाचित सभापति गगन थापासहितका केही नेता भने विमानस्थलमा देखिएनन्।

देउवा गत फागुन १३ गते सिंगापुर गएका थिए। त्यसपछि चैत ७ गते हङकङ पुगेर परिवारसहित त्यहाँ बसेका थिए। करिब साढे पाँच महिनाको विदेश बसाइपछि उनी बिहीबार काठमाडौं फर्किएका हुन्।

देउवासँगै विदेशमा रहेका उनकी पत्नी आरजु राणा देउवा र छोरा जयवीर भने स्वदेश फर्किएका छैनन्।

लामो समयपछि देउवाको स्वदेश फिर्तीलाई कांग्रेसभित्रको पछिल्लो राजनीतिक घटनाक्रमसँग जोडेर चासोका साथ हेरिएको छ। उनको आगमनपछि पार्टीभित्रको शक्ति सन्तुलन, नेतृत्वबीचको सम्बन्ध र आगामी राजनीतिक रणनीतिबारे बहस थप तीव्र हुने अनुमान गरिएको छ।