उत्पादन तथा प्रशोधन समूहका कम्पनीको नाफा ३९% बढ्यो, जेनजी स्टकको कमजोर प्रदर्शन

काठमाण्डौ । उत्पादन तथा प्रशोधन समूहका कम्पनीहरुले गत आर्थिक वर्षमा पौने ६ अर्ब रुपैयाँ मुनाफा कमाएका छन् । सो समूहका १५ कम्पनीले गत आर्थिक वर्ष २०८२–८३ मा ५ अर्ब ८३ करोड ६ लाख रुपैयाँ नाफा कमाएका हुन् ।  

यो नाफा अघिल्लो आर्थिक वर्ष २०८१–८२ को तुलनामा ३९ प्रतिशत बढी हो । अघिल्लो आवमा उक्त कम्पनीहरुले ४ अर्ब १९ करोड ४७ लाख रुपैयाँ नाफा कमाएका थिए ।  

वित्तीय विवरणअनुसार १२ कम्पनीमा नाफामा छन् भने तीन कम्पनीले घाटा ब्यहोरेका छन् । नाफामा रहेका कम्पनीमध्ये पनि अधिकांशको नाफा अघिल्लो आवको तुलनामा घटेको छ ।  

सो मध्ये सोनापुर मिनरल्स आयलको नाफामा उल्लेख्य सुधार देखिनु र अघिल्लो आवमा घाटा ब्यहोरेको बोटलर्स नेपालले नाफा कमाएकाले यो समूहका कम्पनीहरुको समग्र नाफा बढेको देखिएको हो । कम्पनीहरुको छुट्टाछुट्टै विवरण केलाउने हो भने अधिकांशको अवस्था सन्तोषजनक देखिदैन ।  

गत आवको अन्त्यसम्म ओम मेगाश्री फर्मास्युटिकल्स, सागर डिष्टिलरी र घोराही सिमेन्टले भने घाटा ब्यहोरेका छन् ।  

सर्वाधिक नाफा कमाउनेमा हिमालयन डिष्टिलरी रहेको छ । यो कम्पनीले १ अर्ब २० करोड रुपैयाँ नाफा कमाएको छ । कम्पनीको नाफा २८.१४ प्रतिशत वृद्धि भएको छ ।  

साथै अघिल्लो आवको तुलानामा नाफा घट्ने कम्पनीहरुमा युनिलिभर नेपाल, शिवम् सिमेन्ट, रिलायन्स स्पिनिङ मिल्स, पाल्पा सिमेन्ट र सर्वोत्तम पेन्ट्स इन्डष्ट्रिज रहेको छ । सबैभन्दा धेरै पाल्पा सिमेन्टको ५९ प्रतिशतले घटेको छ ।  

उत्पादन लागतमा वृद्धि, बजारमा मागको अनिश्चितता, कच्चा पदार्थको मूल्यवृद्धि, उच्च ब्याजदर तथा बढ्दो सञ्चालन खर्चले कम्पनीहरूको नाफामा दबाब परेको छ । केही कम्पनीको आम्दानी बढे पनि खर्चको तुलनामा नाफा विस्तार हुन नसक्दा समग्र वित्तीय प्रदर्शन सन्तोषजनक बन्न सकेको छैन ।

विशेषगरी उत्पादन तथा प्रशोधन क्षेत्रमा ठूलो लगानी आवश्यक पर्ने भएकाले ऋणको भार र ब्याज खर्चले कम्पनीहरूको वित्तीय स्वास्थ्यमा थप दबाब सिर्जना गरेको देखिन्छ । बजारमा प्रतिस्पर्धा बढ्दै जाँदा उत्पादनको बिक्री र मूल्य निर्धारणमा समेत चुनौती थपिएको छ ।  

यस्तो अवस्थामा कम्पनीहरूले लागत नियन्त्रण, उत्पादन क्षमता वृद्धि, बजार विस्तार तथा वित्तीय व्यवस्थापनमा सुधार गर्न नसके आगामी दिनमा वित्तीय दबाब अझ बढ्न सक्ने देखिन्छ।

Sponsored