टिकटकमा १३ लाख फलोअर्स, सडकमा गोली हानी हत्या

काठमाण्डौ । पाकिस्तानकी चर्चित टिकटक स्टार शम्सु बिबी उर्फ आयशा गिलामानाको गोली हानी हत्या गरिएको छ। इस्लामाबादनजिकैको ट्याक्सिला क्षेत्रमा मोटरसाइकलमा आएका दुई अज्ञात व्यक्तिले उनी सवार कारमाथि अन्धाधुन्ध गोली चलाउँदा उनको मृत्यु भएको हो।

घटना अगस्ट १४ मा भएको जनाइएको छ। प्रहरीमा दर्ता गरिएको उजुरीअनुसार आयशा आफ्नी १५ वर्षीया बहिनी असीमा र भाइ नैमतुल्लाहसँग कारमा घरबाट बाहिर निस्किएकी थिइन्। केही समयपछि पेट्रोल पम्पनजिकै मोटरसाइकलमा आएका दुई व्यक्तिले उनीहरू सवार कारलाई लक्षित गरी गोली प्रहार गरेका थिए।

गोली आयशाको घाँटीमा लागेपछि उनको घटनास्थलमै मृत्यु भएको उनका बुबा फजल साहिबजादाले बताएका छन्। गोली प्रहारपछि कार अनियन्त्रित भई अर्को सवारीसाधनसँग ठोक्किएको थियो। दुर्घटनामा आयशाकी बहिनी असीमा गम्भीर घाइते भएकी छन्।

आयशा पछिल्लो तीन–चार वर्षदेखि टिकटकमा सक्रिय थिइन्। सामाजिक सञ्जालमा लोकप्रिय बनेकी उनका १३ लाखभन्दा बढी फलोअर्स रहेको बताइएको छ।

घटनाको अनुसन्धान आर्थिक कारोबारतर्फ समेत केन्द्रित भएको छ। आयशाका बुबाले छोरीको केही व्यक्तिसँग आर्थिक लेनदेन रहेको र आफ्नो रकम फिर्ता मागेपछि उनलाई ज्यान मार्ने धम्की आएको दाबी गरेका छन्।

उनले काउसर, जावेद उर्फ शाहिन र काशिफ उर्फ काशीमाथि घटनामा संलग्न हुन सक्ने आशंका गर्दै प्रहरीमा उजुरी दिएका छन्। यद्यपि ती व्यक्तिहरूको घटनामा संलग्नता अहिलेसम्म पुष्टि भइसकेको छैन।

प्रहरीले उजुरीमा नाम उल्लेख भएका व्यक्तिसहित दुई अज्ञात आक्रमणकारीविरुद्ध हत्या, हत्या प्रयास तथा सामूहिक आपराधिक उद्देश्यसम्बन्धी कसुरमा मुद्दा दर्ता गरी अनुसन्धान अघि बढाएको छ।

चर्चित सामाजिक सञ्जाल स्टारमाथि सार्वजनिक स्थानमै भएको गोली प्रहार र त्यसको पृष्ठभूमिमा आर्थिक लेनदेनको विवाद रहेको आशंकाले पाकिस्तानमा घटनालाई थप चर्चित बनाएको छ।