इमरान खानको स्वास्थ्यमा विश्व क्रिकेटको चिन्ता, २२ पूर्व कप्तानको संयुक्त अपिल

काठमाण्डौ । पाकिस्तानका पूर्वप्रधानमन्त्री तथा विश्वकप विजेता पूर्वकप्तान इमरान खानको स्वास्थ्य अवस्थालाई लिएर विश्व क्रिकेट समुदायबाट फेरि दबाब बढेको छ । विभिन्न देशका २२ जना पूर्व अन्तर्राष्ट्रिय क्रिकेट कप्तानले पाकिस्तानी प्रधानमन्त्री शेहबाज शरीफलाई पत्र लेख्दै इमरानको स्वतन्त्र स्वास्थ्य परीक्षण र आवश्यक उपचार तत्काल सुनिश्चित गर्न आग्रह गरेका छन् ।

पछिल्लो छ महिनामा पूर्व अन्तर्राष्ट्रिय कप्तानहरूले इमरानको स्वास्थ्यबारे पाकिस्तानी सरकारलाई गरेको यो दोस्रो सामूहिक अपिल हो । यसअघि फेब्रुअरीमा १४ जना पूर्व कप्तानले पनि उनको स्वास्थ्य अवस्थाप्रति चिन्ता व्यक्त गर्दै पत्र लेखेका थिए ।

क्रिकेटसम्बन्धी वेबसाइट क्रिकइन्फोका अनुसार पछिल्लो पत्रमा पूर्व कप्तानहरूले पाकिस्तानको सर्वोच्च अदालतले दिएको निर्देशन पूर्ण रूपमा कार्यान्वयन गर्न प्रधानमन्त्री शरीफलाई आग्रह गरेका छन् ।

सर्वोच्च अदालतले इमरान खानलाई अस्पताल लगेर उनका निजी चिकित्सक तथा बहिनी डा. उज्मा खानसमेत सहभागी मेडिकल बोर्डमार्फत स्वास्थ्य परीक्षण गराउन निर्देशन दिएको थियो । अदालतले परिवारसँग हुने साप्ताहिक भेटघाट पुनः सञ्चालन गर्नसमेत आदेश दिएको बताइएको छ ।

तर पूर्व कप्तानहरूले अदालतको निर्देशनअनुसार गठन हुनुपर्ने मेडिकल बोर्डले पूर्ण रूपमा काम गर्न नपाउँदै इमरानलाई अस्पतालबाट पुनः अदियाला जेल फर्काइएको भन्दै असन्तुष्टि जनाएका छन् ।

पत्रमा इमरानलाई केही घण्टा मात्रै अस्पतालमा राखिएको र अदालतले भनेअनुसारको बोर्डको सट्टा राज्यद्वारा नियुक्त टोलीले परीक्षण गरेर उनलाई ‘चिकित्सकीय रूपमा फिट’ घोषणा गरेको उल्लेख छ।

तीन मुख्य माग

२२ पूर्व कप्तानले पाकिस्तान सरकारसमक्ष मुख्य रूपमा तीन माग अघि सारेका छन् ।

पहिलो, सर्वोच्च अदालतको निर्देशनअनुसार इमरानका निजी चिकित्सकसमेत सहभागी स्वतन्त्र मेडिकल बोर्डलाई उनको स्वास्थ्यको पूर्ण मूल्यांकन गर्न दिनुपर्ने माग गरिएको छ । विशेषगरी उनको दाहिने आँखाको दृष्टि गम्भीर रूपमा प्रभावित भएको दाबीबारे विस्तृत परीक्षण हुनुपर्ने उनीहरूको भनाइ छ ।

दोस्रो, अदालतले पुनःस्थापित गरेको साप्ताहिक पारिवारिक भेटघाटमा कुनै प्रशासनिक अवरोध वा ढिलाइ हुन नहुने माग गरिएको छ ।

तेस्रो, स्वास्थ्य परीक्षणपछि उपचार आवश्यक देखिए चिकित्सकले सिफारिस गरेको उपचार तत्काल उपलब्ध गराइनुपर्ने उनीहरूले बताएका छन् ।

आँखाको दृष्टि गुमेको परिवारको दाबी

इमरान खानको परिवारले जेलमा पर्याप्त र समयमै उपचार नपाएका कारण उनको एउटा आँखाको दृष्टि लगभग पूर्ण रूपमा गुमेको दाबी गर्दै आएको छ ।

पाकिस्तान सरकारले भने इमरानमाथि जेलमा दुर्व्यवहार गरिएको वा उपचारबाट वञ्चित गरिएको आरोप अस्वीकार गर्दै आएको छ ।

पूर्व कप्तानहरूले आफ्नो अपिललाई राजनीतिक रूपमा नबुझ्नसमेत आग्रह गरेका छन् । उनीहरूले पाकिस्तानको आन्तरिक राजनीति वा कानुनी प्रक्रियामा हस्तक्षेप गर्न खोजेको नभई क्रिकेटसँगको लामो सम्बन्ध र मानवीय आधारमा इमरानको उपचार सुनिश्चित गर्न आग्रह गरेको बताएका छन् ।

क्रिकेटका ठूला नाम एउटै पत्रमा

पत्रमा हस्ताक्षर गर्ने पूर्व कप्तानहरूको सूचीमा विश्व क्रिकेटका चर्चित नामहरू छन् ।

माइकल एथर्टन, एलन बोर्डर, माइकल ब्रेअर्ली, ग्रेग च्यापेल, इयान च्यापेल, एलिस्टर कुक, सुनील गावस्कर, एडम गिलक्रिस्ट, नासेर हुसेन, क्लाइभ लोयड, कपिल देव, अर्जुन रणतुंगा, एन्ड्रयू स्ट्रस, स्टिभ वा र जोन राइटसहित २२ जना पूर्व कप्तानले अपिलमा हस्ताक्षर गरेका छन् ।

यसमा पुरुषसँगै महिला क्रिकेटका पूर्व कप्तान एलेक्स ब्ल्याकवेल र बेलिन्डा क्लार्कसमेत छन् ।

राजनीति हुँदै जेलसम्म

इमरान खान सन् २०१८ देखि २०२२ सम्म पाकिस्तानका प्रधानमन्त्री थिए । सत्ता बाहिरिएपछि उनीविरुद्ध विभिन्न मुद्दा अघि बढेका छन् र केही मुद्दामा जेल सजायसमेत सुनाइएको छ ।

उनका समर्थक र परिवारले उनीविरुद्धका धेरै मुद्दा राजनीतिक प्रतिशोधबाट प्रेरित भएको दाबी गर्दै आएका छन् । पाकिस्तान सरकारले भने कानुनी प्रक्रिया स्वतन्त्र रूपमा अघि बढेको बताउँदै आएको छ ।

अन्तर्राष्ट्रिय मानवअधिकार संस्थाहरूले पनि इमरानविरुद्धका मुद्दाको निष्पक्षता तथा जेलमा उनको अवस्थालाई लिएर समय–समयमा चासो व्यक्त गरेका छन् ।

एम्नेस्टी इन्टरनेशनल, ह्युमन राइट्स वाच र इन्टरनेशनल फेडरेसन फर ह्युमन राइट्सलगायत संस्थाले उनको कानुनी प्रक्रिया र हिरासतको अवस्थाबारे प्रश्न उठाएका छन् ।

इमरानका छोराहरूले समेत उनलाई कठिन जेल अवस्थामा राखिएको र मानसिक दबाब दिइएको आरोप लगाउँदै आएका छन् । पाकिस्तानी अधिकारीहरूले भने ती आरोप अस्वीकार गरेका छन् ।

क्रिकेटबाट विश्वव्यापी पहिचान बनाएका इमरानको स्वास्थ्यलाई लिएर एकैपटक २२ पूर्व अन्तर्राष्ट्रिय कप्तानले पुनः आवाज उठाएपछि उनको जेल जीवन र उपचारको विषय फेरि अन्तर्राष्ट्रिय चर्चामा आएको छ ।