चीनतर्फको ताल फुटेपछिको बाढी स्याफ्रुबेसी आइपुग्यो, अब त्रिशूली हुँदै मुग्लिनतर्फ जोखिम

काठमाण्डौ । चीनको छोचेन खोला र पुरेपू त्साङ्पो नदीको संगम क्षेत्रनजिक बनेको ठूलो ताल फुटेपछि आएको बाढी रसुवाको स्याफ्रुबेसी आइपुगेको छ।

बाढी पूर्वानुमान महाशाखाका अनुसार शुक्रबार दिउँसो १२ बजेर ३१ मिनेटमा भोटेकोशी नदीमा आएको बाढी स्याफ्रुबेसी पुगेको हो।

माथिल्लो तटीय क्षेत्रबाट बाढी तलतर्फ सर्ने क्रम जारी रहेकाले भोटेकोशी र त्रिशूली नदी आसपासका बासिन्दालाई विशेष सतर्कता अपनाउन आग्रह गरिएको छ।

महाशाखाले त्रिशूली नदीको तटीय क्षेत्र, विशेषगरी मुग्लिनसम्मका नदी किनार र जोखिमयुक्त स्थानमा रहेका नागरिकलाई अर्को सूचना नआएसम्म सुरक्षित स्थानमा रहन भनेको छ।

Sponsored

Sponsored

चीनतर्फ पहिरो र भग्नावशेषले नदी थुनिएर बनेको ताल फुटेको सूचना आएपछि यसअघि नै रसुवा र नुवाकोट क्षेत्रमा उच्च सतर्कता अपनाइएको थियो। जोखिमलाई मध्यनजर गर्दै नदी किनारमा खटिएका उद्धारकर्मी, डोजर तथा अन्य उपकरणसमेत सुरक्षित स्थानतर्फ सारिएका छन्।

बाढी स्याफ्रुबेसी आइपुगेपछि अब तल्लो तटीय क्षेत्रमा बहाव बढ्न सक्ने भएकाले नदी किनारमा नजान, बगर क्षेत्रमा नबस्न र स्थानीय प्रशासन तथा सुरक्षा निकायले जारी गर्ने सूचनालाई पालना गर्न आग्रह गरिएको छ।

भोटेकोशी हुँदै त्रिशूलीतर्फ बाढी सर्ने भएकाले नुवाकोट, धादिङ र मुग्लिन आसपासका तटीय क्षेत्रमा समेत निगरानी र सतर्कता बढाइएको छ।