भारतको उत्तर प्रदेशमा ७२ घण्टे अविरल वर्षा, ५८ जनाको मृत्यु

 

काठमाण्डौ । भारतको उत्तर प्रदेशमा लगातार करिब ७२ घण्टादेखि भइरहेको अविरल वर्षाले ठूलो जनधनको क्षति पुर्‍याएको छ । भारी वर्षासँगै आएको बाढी, जलभराव, घर तथा रुख ढल्ने लगायतका घटनामा शनिबार साँझसम्म कम्तीमा ५८ जनाको मृत्यु भएको भारतीय सञ्चारमाध्यमहरूले जनाएका छन् ।

लगातारको वर्षाले प्रदेशका अधिकांश क्षेत्रको जनजीवन प्रभावित बनेको छ । सडक जलमग्न भएका छन् भने विभिन्न स्थानमा कच्ची घर भत्किएका, रुख तथा विद्युत्का पोल ढलेका र विद्युत् आपूर्ति अवरुद्ध भएका छन् । कृषि क्षेत्रमा समेत ठूलो क्षति पुगेको छ ।

शनिबार मात्रै उत्तर प्रदेशका करिब १० जिल्लामा २०० मिलिमिटरभन्दा बढी वर्षा मापन गरिएको छ । लखीमपुर खीरीमा एकै दिन ३४२ मिलिमिटर वर्षा भएको छ भने सीतापुरमा २७३.२, बाँदामा २४५.६ र बहराइचमा २३९ मिलिमिटर वर्षा रेकर्ड गरिएको छ ।

बाँदा र हमीरपुरमा एकै दिनको वर्षाको पुरानो रेकर्ड तोडिएको छ । कानपुरमा १७५.४ मिलिमिटर वर्षा हुँदा त्यहाँ ४५ वर्षयताकै उच्च वर्षाको रेकर्ड बनेको बताइएको छ ।

अवध क्षेत्रमा सबैभन्दा बढी मानवीय क्षति

वर्षाजन्य घटनामा सबैभन्दा धेरै २६ जनाको मृत्यु अवध क्षेत्रका जिल्लामा भएको छ । सीतापुरमा ६, बहराइचमा ५, बलरामपुर र अयोध्यामा ४–४ तथा बाराबंकीमा ३ जनाको मृत्यु भएको छ ।

यस्तै, गोन्डा, अमेठी र श्रावस्तीमा पनि मानवीय क्षति भएको छ । लखीमपुर खीरीमा ६, गोरखपुरमा ५, हरदोईमा ४ र हमीरपुरमा ३ जनाको मृत्यु भएको विवरण छ । अन्य केही जिल्लामा पनि एक–दुई जनाको मृत्यु भएको जनाइएको छ ।

भारी वर्षासँगै आएको हावाहुरीका कारण विभिन्न स्थानमा रुख र विद्युत्का पोल ढलेका छन् । सडक अवरुद्ध भएका छन् भने विद्युत् प्रसारण प्रणालीमा समेत क्षति पुगेको छ ।

पछिल्लो ४८ घण्टामा अतिवृष्टि र हावाहुरीका कारण कम्तीमा ११७ घरमा क्षति पुगेको उत्तर प्रदेश सरकारले जनाएको छ । जोखिममा रहेका कच्चा घरमा बस्ने परिवारलाई आवश्यकता अनुसार सुरक्षित स्थानमा सार्न स्थानीय प्रशासनलाई निर्देशन दिइएको छ ।

लखनऊमा सडकदेखि विमानस्थलसम्म प्रभावित

राजधानी लखनऊ पनि लगातारको वर्षाबाट नराम्ररी प्रभावित भएको छ । विभिन्न क्षेत्रमा घुँडासम्म पानी जमेको छ भने सडक यातायात अस्तव्यस्त बनेको छ ।

पुरनिया ओभरब्रिजमुनि पानी जम्दा अटो तथा ई–रिक्सा पल्टिएका घटना भएका छन् । निशातगन्ज क्षेत्रमा करिब १५० वर्ष पुरानो बरको रुखसमेत ढलेको छ ।

लखनऊ नगर निगमका अनुसार सहरमा मात्रै १२५ भन्दा बढी रुख ढलेका छन् । केही स्थानमा सवारीसाधनमा क्षति पुगे पनि ती घटनामा थप मानवीय क्षति नभएको जनाइएको छ ।

चारबाग रेलवे स्टेसन क्षेत्रमा पानी जम्दा रेल सेवासमेत प्रभावित भएको छ । रेलमार्गमा पानी भरिएपछि केही खण्डमा रेलको गति घटाइएको छ ।

कम भिजिबिलिटीका कारण लखनऊ विमानस्थलमा अवतरण गर्न लागेका छवटा उडान दिल्ली तथा नोएडातर्फ डाइभर्ट गरिएको थियो । मौसममा केही सुधार आएपछि ती विमान पुनः लखनऊ फर्किएका थिए ।

तापक्रममा पनि ठूलो गिरावट

भारी वर्षाका कारण उत्तर प्रदेशका विभिन्न सहरको तापक्रम अस्वाभाविक रूपमा घटेको छ । बरेलीमा अधिकतम तापक्रम २१.३ डिग्री सेल्सियसमा झरेको छ, जुन सेप्टेम्बर महिनाका लागि त्यहाँ अहिलेसम्मकै न्यूनमध्ये एक भएको बताइएको छ ।

इटावा, शाहजहाँपुर, मुरादाबाद र आग्रामा पनि सेप्टेम्बर महिनाको तुलनामा अत्यधिक चिसो मौसम अनुभव गरिएको छ ।

आज पनि भारी वर्षाको चेतावनी

भारतीय मौसम विभागले आइतबार पनि उत्तर प्रदेशका विभिन्न क्षेत्रमा भारीदेखि अति भारी वर्षा हुन सक्ने चेतावनी दिएको छ ।

मुरादाबाद, रामपुर, पीलीभीत र बरेलीमा अति भारी वर्षाको सम्भावना रहेको भन्दै ‘ओरेन्ज अलर्ट’ जारी गरिएको छ । तराई क्षेत्रका थप नौ जिल्लामा ‘येलो अलर्ट’ जारी गरिएको छ ।

प्रदेशका २७ जिल्लामा मेघगर्जनसहित प्रतिघण्टा ४० देखि ६० किलोमिटर वेगमा हावाहुरी चल्न सक्ने चेतावनीसमेत दिइएको छ ।

क्षेत्रीय मौसम विज्ञान केन्द्रका वरिष्ठ वैज्ञानिक अतुल कुमार सिंहका अनुसार सोमबारदेखि उत्तर प्रदेशमा वर्षाको गतिविधि क्रमशः कमजोर हुँदै जाने सम्भावना छ ।

नेपालसँग सीमा जोडिएका क्षेत्रमा उच्च सतर्कता

नेपालमा समेत भारी वर्षा भइरहेको अवस्थामा उत्तर प्रदेशका नेपालसँग सीमा जोडिएका तथा पूर्वी जिल्लामा नदीको जलस्तर बढ्न सक्ने भन्दै उच्च सतर्कता अपनाइएको छ ।

सम्बन्धित जिल्लाका प्रशासनलाई नदीको जलस्तर निरन्तर निगरानी गर्न, सम्भावित डुबान क्षेत्र पहिचान गर्न र उद्धार टोलीलाई तयारी अवस्थामा राख्न निर्देशन दिइएको छ ।

उत्तर प्रदेशका ६३ जिल्लामा सामान्यभन्दा बढी वर्षा भएको जनाइएको छ । पछिल्लो २४ घण्टामा प्रदेशभर औसतभन्दा करिब १९ गुणा बढी वर्षा भएको विवरण छ ।

फर्रुखाबादमा सामान्यभन्दा करिब २०० गुणा र कानपुर नगरमा १६० गुणा बढी वर्षा भएको भारतीय सञ्चारमाध्यमहरूले उल्लेख गरेका छन् ।

लगातारको वर्षा, बाढी र हावाहुरीले थप क्षति पुर्‍याउन सक्ने भन्दै प्रशासनले प्रभावित क्षेत्रमा राहत तथा उद्धार कार्य तीव्र पारेको छ ।