पाकिस्तानमा रेल दुर्घटना, १४ वटै डिब्बा पटरीबाट खसे; ६ जनाको मृत्यु

 

काठमाण्डौ । पाकिस्तानको पञ्जाब प्रान्तमा मंगलबार बिहान भएको रेल दुर्घटनामा कम्तीमा ६ जनाको मृत्यु भएको छ भने ३० जना घाइते भएका छन्।

कराँचीबाट पेशावरतर्फ जाँदै गरेको रहमान बाबा एक्सप्रेस मुल्तानस्थित शेर शाह पुलनजिकै दुर्घटनामा परेको हो। स्थानीय समयअनुसार बिहान करिब ५ः१५ बजे रेल पटरीबाट खसेको पाकिस्तानी सञ्चारमाध्यमले जनाएका छन्।

दुर्घटनामा रेलका सबै १४ वटा डिब्बा पटरीबाट खसेका छन्। घाइतेहरूलाई उपचारका लागि मुल्तानस्थित निस्थार अस्पतालमा लगिएको छ। घटनास्थलमा प्रहरी तथा उद्धार टोली परिचालन गरिएको छ।

पाकिस्तानका प्रधानमन्त्री शहबाज सरिफले दुर्घटनामा भएको मानवीय क्षतिप्रति दुःख व्यक्त गर्दै उद्धार कार्य तीव्र बनाउन र घाइतेहरूको तत्काल उपचार सुनिश्चित गर्न सम्बन्धित निकायलाई निर्देशन दिएका छन्।

दुर्घटनाको कारण अहिलेसम्म खुलेको छैन। सम्बन्धित निकायले घटनाबारे अनुसन्धान अघि बढाउने तयारी गरेको बताइएको छ।

पाकिस्तानमा यसअघि पनि ठूला रेल दुर्घटना हुँदै आएका छन्। सन् २०२३ को अगस्टमा सिन्ध प्रान्तको नवाबशाहनजिकै हजारा एक्सप्रेस दुर्घटना हुँदा कम्तीमा ३० जनाको मृत्यु भएको थियो भने १०० भन्दा बढी घाइते भएका थिए।

पछिल्लो दुर्घटनाले फेरि एकपटक पाकिस्तानको रेल सुरक्षा, ट्र्याक मर्मत र सञ्चालन व्यवस्थामाथि प्रश्न उठाएको छ।